Onyń Farızamen tanys-bilistigi 1954 jyldan bastalypty. О́z oqýshylarynan nebary 5-6 jas úlken ustaz aýyl mektebine orys tili men ádebıeti páninen sabaq berýge barady.
– Men Gýrev (qazirgi Atyraý) oblysynyń Novobogat aýdanyna qarasty Manashy aýylyna ustaz bolyp bardym. Bolashaq tanymal aqyn Farıza men sabaq beretin synypta oqydy – ol bastamashyl, muqııat, alǵyr, talantty jáne týǵan elin, jerin súıetin qyz boldy. Sózinde turatyn, bir nársege ýáde berse oryndamaı tynbaıtyn jaýapkershiligi joǵary oqýshy edi, sondaı-aq dombyrany jaqsy tartýshy edi. Qazaqtyń belgili kúıshileriniń shyǵarmalaryn úıretkan anasyna rıza bolatyn. Ol bir oqýlyq jetispeıtin qıyn kez edi, alty sabaqtan soń balalar qalyp meniń aıtýymmen dıktant jazatyn. Bir-birimizge ókpe-renish, aryz-shaǵym joq, birimizdi-birimiz túsinip, qoldap, birige ketetinbiz. Men olarǵa orys tilin úırettim, al olar maǵan qazaqsha úıretti, – dep alys kúnderdi jyly shyraımen eske aldy Klara Zorına.
Búginde 86 jasqa tolǵan Klara Zorına Farıza, onyń ómiri, ol súıip jyrlaǵan Mańǵystaý taqyrybyna kóbirek oralyp, lıseı oqýshylaryna kóp maǵlumat berdi. Sondaı-aq, «Dorogoı, lıýbımoı Klare Dmıtrıevne – s beskonechnym chývstvom poklonenııa pered neı. Farıza, vasha skromnaıa ýchenısa. 1984, 7 ııýlıa, Alma-Ata» degen qoltańbasy qalǵan kitapty qasterleı ustap, halqynyń yqylasyna bólengen aqyn shákirtin árdaıym esine alyp otyratynyn jetkizdi.
Aqtaýdaǵy káris etnomádenı birlestigi shákirtterin oqýshy Farızanyń ómirimen jáne onyń kózi tiri ustazy Klara Dmıtrıevnamen júzdestirý barysynda balalar Farıza Ońǵarsynovanyń óleńderin jatqa mánerlep oqydy.
Shákirti úshin mereılengen ustaz-ana lıseı oqýshylaryna alǵysyn jetkizip, ónegeli býyn bolyp ósip-jetilýine tilek bildirdi. Qart ustaz balalyǵy soǵys, odan keıingi qıyn jyldarǵa tap kelgen Farıza zamandastarymen qazirgi balalardyń jaǵdaıyn, zamanyn salystyrýǵa kelmeıtindigin, sondyqtan bar múmkindikti paıdalanyp oqyp-bilim alýǵa tyrysý qajettigin aıtty.
Mańǵystaý oblysy
