-Bizdiń partııaǵa kómek surap kelýshiler kóp. Ásirese, jumyssyzdyq máselesi jıi qozǵalady. Jumyssyzdardy kásipkerlikke jumyldyrý úshin úlken sharalar jasalýda. Tehnopark óndiristik aımaǵy daıyn. 23 kásipker sol jerden kásibin bastamaqshy. «Saq» bazarynda 200 oryn bos tur. Saýda jasaımyn deýshilerge alǵashqy 6 aıda jaldaý qunynan bosatylady, deıdi «Nur Otan» partııasy Jańaózen qalalyq fılıalynyń 1-orynbasary Nurbergen Hýdıbaev.
Jer qatynastary, sáýlet jáne qurylys, jol qatynastary, turǵyn úı, jumyspen qamtý, jobalardy súıemeldeý, aýyl sharýashylyǵyn qoldaý qory, «Damý» qory, «Kaspıı» ÁKQ men ekinshi deńgeıli bankter ókilderi kópshiliktiń túıitkildi suraqtaryna jaýap berýde.
Jańaózen qalasynyń turǵyny Qýanysh Musaev ashyq esik kúnine ózin tolǵandyrǵan suraqpen keldi. «Bastaý» jobasy boıynsha bilim aldym. Qaıtarymsyz grant alǵym keledi. Bul qarajatqa baspahanaǵa qajetti tehnıka alǵym keledi. Kásip bastaıtyn ǵımaratymyz daıyn tur. Otbasylyq kásip retinde ashyp, damytqymyz keledi» deıdi ol.
Mańǵystaý oblysy kásipkerler palatasynyń adamı kapıtaldy damytý bóliminiń qyzmetkeri Rýslan Bısekenovtiń aıtýynsha, jańaózendik turǵyndardyń kópshiligin nesıe alý, salyq tólemderinen bosatý, jer telimderine qol jetkizý máseleleri alańdatady eken. Kelýshilerdiń basym bóligi grant alǵan jastar. Olar kásibin endi qolǵa alyp jatqandyqtan salyq tólemi boıynsha jeńildik jasalǵandaryn qalaıdy. Barlyq azamattarǵa tıisti sala mamandary tolyqqandy jaýap berip otyr.
