Qazaqstan UOK prezıdenti Tımýr Qulybaevtyń bastamasymen bekitilgen elimizdiń eń basty sporttyq júldesi «Altyn Samgay-2019» bıyl jańarǵan formatty ótti. Saltanatty keshke otandyq sport juldyzdary men tanymal estrada ókilderi, qoǵam qaıratkerleri men medıatulǵalar jáne jankúıerler jınaldy.
#teamKZ jankúıerleri alǵash ret Júldege qatysý múmkindigin ıelenip, komandanyń bir bólshegi retinde ulttyq qurama múshelerimen emen-jarqyn tildesti. Aıta ketelik, elimizdiń úzdik sportshylaryn jankúıerler tańdaǵan bolatyn. 15-30 qarasha aralyǵynda oqyrmandar awards.olympic.kz saıtynda daýys berip, eki apta boıy elimizdiń úzdikteri anyqtaldy. Osy aralyqta 820 myń daýys qabyldandy.
«Jazǵy sport túrlerindegi úzdik sportshy» atalymynda Bekzad Nurdáýletov jeńimpaz atandy. Ol bıyl Ekaterınbýrgte ótken álem chempıonatyn sátti aıaqtady. Bekzad jartylaı fınalda olımpıada chempıony ári tórt dúrkin álem chempıony Hýlıo Sesar La Krýsty (Kýba) nokdaýnǵa jiberip, senimdi túrde utqan bolatyn. Fınalda Nurdáýletov ózbek boksshysynan basym tústi.
«Qysqy sport túrlerindegi úzdik sportshy» atalymynda mánerlep syrǵanaýdan Qazaqstan juldyzy Elızabet Tursynbaeva jeńiske jetti. Ol bıyl Saıtamada (Japonııa) ótken mánerlep syrǵanaýdan álem chempıonatynda kúmis júlde ıelendi. Tursynbaeva erkin baǵdarlamada tórttik salhovty oryndap, bul elementti eresekter arasynda oryndaǵan tuńǵysh sportshy atandy.
«Úzdik jas sportshy» atalymynda karateden Chılıde ótken jastar arasyndaǵy álem chempıonatynyń jeńimpazy Ábilmansur Batyrǵalı top jardy. «Jazǵy sport túrlerindegi úzdik jattyqtyrýshy» atalymynda erkin kuresten Qazaqstan komandasynyń bas bapkeri Áset Serikbaev, «Qysqy sport túrlerindegi úzdik jattyqtyrýshy» atalymynda frıstaıl-mogýldan Qazaqstan komandasynyń bas bapkeri Elena Krýglyhına kósh bastady. Aıta ketelik, Elena atalǵan júldeni osymen ekinshi ret ıelenip otyr. Bıyl Krýglyhına jattyqtyratyn Iýlııa Galysheva Qazaqstan tarıhynda tuńǵysh ret frıstaıl-mogýldan álem chempıony atandy.
«Úzdik ulttyq sporttyq federasııa» atalymynda Qazaqstan shaıbaly hokkeı federasııasy qara úzip shyqty. «Úzdik sporttyq aımaq» atalymy Qyzylorda oblystyq dene shynyqtyrý jáne sport Basqarmasyna buıyrsa, «Jyl jańalyǵy» atalymynda erkin kúresten Qazaqstan komandasynyń múshesi, elimizde ótken lısenzııalyq álem chempıonatynda 2020 jylǵy Tokıo Olımpıadasyna joldama jeńip alǵan Álisher Erǵalı jeńiske jetti.
«Jyldyń úzdik komandasy» retinde bıyl Nur-Sultanda ótken álem chempıonatynda (A toby, birinshi dıvızıon) elıtaly dıvızıonǵa joldama alǵan shaıbaly hokkeıden Qazaqstan erler quramasy tanyldy. Qazaqstan Ulttyq Olımpıadalyq komıtetiniń arnaıy júldesi – «Qazaqstan sportynyń maqtanyshy» ataǵyn Qazaqstan UOK prezıdentiniń qolynan qazaq sportynyń ardageri, qysqa qashyqtyqqa jáne estafetada júgirýden KSRO chempıonatynyń jeńimpazy ári júldegeri, KSRO eńbek sińirgen sport sheberi Tuıaqov Ámın Elemesuly aldy.
Bıyl Ulttyq Sporttyq júlde alǵash ret paralımpıdashy sportshylarǵa tabystaldy. О́tken maýsymda múmkindigi shekteýli otandyq atletter túrli halyqaralyq týrnırlerde júldege talasyp, jeńiske degen ynta-jigerimen kózge tústi. «Úzdik paralımpıadalyq sportshy» ataǵy Nurlan Dombaıǵa berildi. Nurlan álem chempıonatynda 75 kelige deıingi salmaqta synǵa túsip, altyn júlde jeńip aldy. Ol óz salmaǵynda álemniń eki dúrkin chempıony atanyp otyr. Al paralımpıadalyq sport túrlerindegi úzdik jattyqtyrýshy ataǵyna Qazaqstan paradzıýdo komandasynyń bas bapkeri Jandos Qııanov laıyq dep tanyldy.
Ulttyq Sporttyq júlde tarıhynda alǵash ret iri jarys kezinde sportshylar janynan tabylatyn keshendi-ǵylymı top mamandarynyń eńbegi atap ótildi. «Úzdik KǴT mamany» ataǵyn 20 jyldan beri sport salasynda, ásirese, boksta eńbek etip kele jatqan dáriger Irek Satov ıelendi. Aıta ketelik, Ulttyq Sporttyq Júldedegi eń jarqyn sátterdiń biri – 2020 jylǵy Tokıo Olımpıadasyna jankúıerler arasynda joldama oınatý boldy. Ulttyq Sporttyq Júldege bılet alǵan jankúıerler arasynda kezdeısoq ádispen eki bılet ıegerleri anyqtaldy.
Jyldaǵy dástúr boıynsha, ulttyq sporttyq júldeni el sportynyń ardagerleri men tanymal sportshylar tabystady. «Qazaqstan» konsert zalynyń sahnasyna Jaqsylyq Úshkempirov, Quralbek Ordabaev, Vıktor Aboımov, Olga Shıshıgına, Gúzel Manıýrova syndy tanymal sportshylar kóterildi. Sportshylarmen birge júlde tabystaǵandar qatarynda óz salasynda erekshe darynymen kózge túsken jandar da bar.
Máselen, shahmattan Fransııa ashyq chempıonatynyń jeńimpazy Saýat Nurǵalıev, zamanaýı ushaq daıyndap, keıin ushaq úlgisin «Boıng» korporasııasy satyp alǵan qyzylordalyq 17 jastaǵy oqýshy Evgenıı Demıdenkolar saltanatty rásimge qatysty. Sondaı-aq, QR mádenıet jáne sport mınıstri Aqtoty Raıymqulova, QR densaýlyq saqtaý mınıstri Eljan Birtanov, Nur-Sultan qalasy ákimi Altaı Kólginovter de sportshylardy marapattady. Júldeni tabystaý rásiminde otandyq estrada juldyzdary óner kórsetti. Atap aıtar bolsaq, «Ninety One», NaZıma, «Moldanazar» toby, Kámshat Joldybaeva, SayMo, Qýandyq Rahym jáne taǵy basqalar bar. Ulttyq Sporttyq Júldeniń televızııalyq nusqasy 8 jeltoqsan kúni «Habar» arnasynda kórsetiledi.
