Bıyl ınvestısııalyq jobalardyń onshaqtysy iske qosyldy. Sonyń biri - Aqtaýdaǵy gıdrooqshaýlaǵysh materıaldardy shyǵaratyn zaýyt. Mundaı kásiporyn qazaqstanda alǵash ret ashylyp otyr. Bıtým qospasymen jasalǵan ónim qurylystyń barlyq salasyna, kópir salýǵa, ǵımarattyń irgetasy men shatyryn jabýǵa deıin qoldanylady.
Bıyl aqpan aıynda iske qosylǵan kásiporyn 9 aıdyń ishinde 1 myń tonnadan astam ónim shyǵarǵan. Onyń 65 prosenti el ishine, 35 prosenti ózge elderge eksporttaldy. Zaýyt dırektory Denız Eroglýdyń aıtýynsha, bıyl ónim Ázirbaıjan, Reseı men Germanııaǵa eksporttalǵan. 2020 jyly Italııa, Tájikstan, Túrkmenstan men Túrkııaǵa jiberý kózdelip otyr. Kelisim-shart jasalypty. Germanııa kompanııasy bul jobany júzege asyrýǵa 250 mıllıon teńge jumsaǵan. Munda 25 jergilikti turǵyn eńbek etýde. Barlyǵy da Túrkııada qaıta daıarlyqtan ótip, jańa tehnologııany meńgergen.
Qazir «Aqtaý teńiz porty» arnaıy ekonomıkalyq aımaǵynda 29 joba júzege asýda. Onyń 18-i iske qosylyp, túrli ónim óndirýge kirisken. Taǵy 11 zaýyttyń qurylysy júrip jatyr. Arnaıy ekonomıkalyq aımaǵynda ınvestorlar úshin túrli jeńildikter qarastyrylǵan.
