Osydan 45 jyl buryn salynǵan ǵımarat múlde ózgergen. Merdiger «Aıt-Gold» JShS-i bes aı ishinde balabaqsha ǵımaratyn tolyq jańalap, edenderdi, esik-terezelerdi jáne santehnıkany aýystyrǵan. Aýlada balalardyń oınaýyna barlyq jaǵdaı jasalyp, tıisti qurylǵylar ornatylǵan. Eń bastysy, baqsha endi sýyq emes. Kishi toptarda - jyly edender salynyp, ystyq sýmen qamtamasyz etilgen. Kúrdeli jóndeýge respýblıkalyq qazynadan 238 mıllıon teńge jumsalǵan. Turǵyndardy merekemen quttyqtaǵan aýdan ákimi Álipbek О́serbaev táýelsizdik jyldary Ordabasy aýdanynda 31 mektep, eki memlekettik jáne 40 jekemenshik balabaqsha salynǵanyn atap ótti. Taıaý jyldary «Aýyl-altyn besigim» baǵdarlamasy aıasynda basqa da memlekettik mektepke deıingi mekemelerde jóndeý jumystary josparlanǵan.
Sondaı-aq mereke qarsańynda Temirlandaǵy shaǵynaýdan turǵyndaryna sportpen shuǵyldanýǵa múmkindik jasalǵan ashyq sport alańy paıdalanýǵa berildi. Aýdandyq bıýdjetten 17 mıllıon teńge bólingen sport nysanynda júgirý, fýtzal, voleıbol jáne basketboldan jarystar ótkizýge bolady. Bul kúni, sonymen qatar, Bórjar, Qajymuqan aýyldyq okrýgterinde oblystyq jáne respýblıkalyq bıýdjet qarajaty esebinen salynǵan jańa mektepter ashyldy.
