Oleg Belıalovtyń jańa týyndysy Ortalyq Qazaqstannyń eń kórikti jerleriniń biri – Qarqaraly ulttyq saıabaǵy týraly baıandaıdy. Bul fılm
kórermenderge qupııasyn búgip jatqan Qarqaralynyń ǵajaıyp tabıǵatyn ashyp, ulttyq saıabaqta mekendeıtin jabaıy janýarlar men qustar týraly kóp maǵlumat beredi. Kartınanyń rejısseri Arqanyń has sulýy – Qarqaraly saıabaǵyn jyldyń tórt maýsymynda túsirgenin aıta ketken jón.
Kórsetilimnen keıin fılmniń shyǵarmashylyq toby túsirilim barysyndaǵy erekshelikterimen bólisti. Rejısser Oleg Belıalov kartınany jasaýǵa qatysqan túsirilim tobyna alǵysyn aıtty. Tusaýkeserge «Qazaqfılmniń» prezıdenti, Qazaqstannyń eńbek sińirgen qaıratkeri Arman Ásenov jáne ózi basshylyq etken jyldary kınostýdııada dokýmentalıstıkanyń myqty mektebin qalap, «Qazaqstannyń tabıǵaty» sıkly boıynsha fılmderdi túsirýdi qolǵa alǵan avtorlardyń biri, aqyn Baqyt Qaıyrbekov qatysty.
Fılmniń túsirý tobyn onyń premerasymen quttyqtaǵan Arman Ásenov búgingi kúni de Sh.Aımanov atyndaǵy «Qazaqfılm» kınostýdııasynda derekti fılmderge úlken kóńil bólinetinin aıtty.
«Dokýmentalıstıka – kıno ónerindegi eń kúrdeli janr. Belgili bir kórinisti túsirip alý úshin óte kóp ýaqyt jumsalady. Al kórkem fılmde bári basqasha, kerek kadrdy aldyn ala qoıyp, akterlerge tapsyrma beresiń de, túsire beresiń. Derekti kıno – bul úlken jumys», - dedi Arman Ásenov.
ALMATY
