Astanada Áskerı-tehnıkalyq yntymaqtastyq máseleleri jónindegi Qazaqstan-Ýkraına birlesken úkimetaralyq komıssııasynyń 4-shi otyrysy bolyp ótti. Komıssııa jumysyna Qazaqstan Respýblıkasy Qorǵanys mınıstriniń orynbasary Sergeı Gromov pen Ýkraına Qorǵanys mınıstriniń orynbasary Aleksandr Oleınık basshylyq jasady.
Otyrys barysynda komıssııaǵa qatysýshylar eki el arasyndaǵy áskerı-tehnıkalyq yntymaqtastyq jáne qorǵanys ónerkásibi keshenderiniń ózara is-qımyly máselelerin qarastyrdy. Taraptar áskerı tehnıkany jetkizý, jóndeý jáne jańǵyrtý jóninde pikir almasty. Sondaı-aq, Qazaqstan aýmaǵynda qyzmet kórsetetin ortalyqtar men birlesken kásiporyndar qurý máseleleri sóz boldy.
Komıssııa otyrysynda Áskerı-teńiz kúshteriniń qurylysy salasyndaǵy yntymaqtastyqqa aıtarlyqtaı mańyz berildi. Sondaı-aq, taraptar Qazaqstan men Ýkraınanyń áskerı-ǵylymı jáne áskerı ókildikteri arasyndaǵy yntymaqtastyqtyń bolashaǵyn talqylady.
– Komıssııa otyrys qarsańynda eki eldiń sarapshylary men qorǵanys ónerkásibi kásiporyndary ókilderiniń arasyndaǵy kezdesý jemisti ótti, – dedi Qazaqstan Qorǵanys mınıstriniń orynbasary Sergeı Gromov. – Búgingi otyrys ta ekijaqty yntymaqtastyqty odan ári nyǵaıta túsetinine senimdimin.
Áskerı-tehnıkalyq yntymaqtastyq máseleleri jónindegi Qazaqstan-Ýkraına birlesken úkimetaralyq komıssııasy 4-shi otyrysynyń qorytyndysy boıynsha hattamaǵa qol qoıyldy.
«Egemen-aqparat».
