Bul nysan kóne Taraz shaharynyń eki myń jyldan astam tarıhyn naqtylaı túsedi. «Kóne Taraz» tarıhı-etnomádenı kesheninde «Rýhanııat jáne tarıhtaný» ortalyǵy, «Qolóner sheberleriniń galereıasy», «Kórkemsýret galereıasy», «Oblystyq tarıhı-ólketaný mýzeıi», «Retro-festıval» amfıteatry, «Kórme» pavılony, «Saǵat» stellasy jáne «Arbat-2» jaıaý júrginshiler alańy sııaqty 8 nysan qamtylǵan.
Búginde atalǵan keshendegi 8 nysan boıynsha qurylys-montaj, árleý-bezendirý jumystary tolyǵymen aıaqtalǵan. Qurylys jumystaryna barlyǵy 1000-nan asa qurylysshy, 100-den astam tehnıka jumyldyrylǵan. Keshendi árleý jumystary Samarqan kirpishterimen júrgizilgen. Bul oraıda О́zbekstannan arnaıy mamandar tartyldy. Máselen, keshen qurylysyna qajetti materıaldardyń 80 paıyzy otandyq óndiris oryndarynan jetkizilse, Samarqan kirpishi, glazýr tósenishteri Qytaı jáne О́zbekstan memleketterinen ákelingen. Glazýr tósenishteri arnaıy peshterde 1800 gradýs temperatýrada aldyn ala ólshemmen daıyndalǵan. Jalpy, keshendegi nysandardyń qabyrǵalaryn árleý jumystaryna 7000 sharshy metrden astam Samarqan kirpishteri, 2000 sharshy metrge glazýr tósenishteri paıdalanylǵan. Al, árleýge paıdalanylǵan travertın tastarynyń elementteri Qyrǵyz elinde ázirlengen. Keshendegi taǵy bir erekshelik, nysandy bezendirý jumystaryna Aısha bıbi kesenesinde kezdesetin segiz buryshty órnek-bederler paıdalanylǵan. «Kóne Taraz» tarıhı-etnomádenı kesheniniń qurylys jumystary aǵymdaǵy jyldyń maýsym aıynda bastalyp, jeltoqsan aıynda aıaqtalyp otyr.
