Aımaqtar • 26 Jeltoqsan, 2019

Túrkistanda kópbalaly isker áıelder forýmy ótti

109 ret kórsetildi

Tabıǵı ósimi joǵary Túrkistan oblysynda 90 myńdaı kópbalaly otbasy bar. Olardyń arasynda kásipkerlikpen aınalysyp, tabys taýyp júrgenderi az emes. Bul oraıda «Eńbek» memlekettik baǵdardamasy aıasynda 3884 áıel kásibı oqýǵa joldanǵan. Olardyń 710-y kópbalaly analar. Al 213 kópbalaly ana turaqty jumysqa ornalassa, 32 705 áıel jumyspen qamtý sharalaryna tartylǵan. Kópbalaly 105 ana óz bıznesin ashypty.

Bul derekter Túrkistan qalasynda «Baqytty otbasy» partııalyq jobasy aıasynda ótken «Batyr ana» kópbalaly isker áıelder forýmynda málim etildi. Kópbalaly analardyń mártebesin kóterý, olardyń kásipkerlikpen aınalysýyna qoldaý kórsetý maqsatyndaǵy forýmǵa oblystyń aýdan, qalalarynda kásipkerlik jáne ózge de salalarda jemisti eńbek etip júrgen analar qatysyp, tájirıbelerimen bólisti. «Forýmǵa kópbalaly analarymyzdy arnaıy shaqyryp otyrmyz. Kópbalaly jáne isker áıelderdiń kásipkerlikpen shuǵyldanýy úshin qandaı qoldaýlar bar? Osy máseleler tóńireginde oı qozǵap, oblys kóleminde kásipker-analarymyzdyń atqaryp jatqan jumystaryn saralap, kópshilik qaýymǵa nasıhattaýdy maqsat etip otyrmyz», – deıdi «Nur Otan» partııasy Túrkistan oblystyq fılıaly tóraǵasynyń birinshi orynbasary Beısenbaı Tájibaev.

Kásipkerlerge kórsetiletin jeńildikter jóninde keńinen baıandaǵan «Atameken» UKP Túrkistan oblystyq fılıalynyń dırektory Dinmuhammed Absattarovtyń aıtýynsha, 2019 jyldyń ishinde «Bastaý bıznes» jáne «Jas kásipker» jobalary aıasynda oblys boıynsha 3345 áıel bilim alǵan. «Eńbek» baǵdarlamasy aıasynda 3 myńnan astam áıel jańa bıznes-ıdeıalardy iske asyrýǵa arnalǵan 1,5 mlrd teńge kólemindegi granttardy ıelengen. «Bıyl «Bıznestiń jol kartasy-2020» memlekettik baǵdarlamasy aıasynda «Bıznes keńesshi» komponenti boıynsha 731 áıel bilim aldy. 200-ge jýyq áıel 680 mln teńge. kóleminde qarjylandyryldy. Kásibin ashamyn deıtin ardaqty analarǵa kómektesýge árqashan daıynbyz», – dedi D. Absattarov. Al «Yrys» mıkroqarjy uıymynyń dırektory Danııar Arynǵazın «Kópbalaly ana» baǵdarlamasy boıynsha 13 kópbalaly anaǵa 2 mln teńgege deıin jeńildetilgen nesıe berilgenin málimdedi. Sondaı-aq jıynda 9 balanyń anasy túrkistandyq Janat Erınbetova demografııaǵa úles qosa otyra jumys isteýge de ýaqyt tabýǵa bolatynyn jetkizdi. On tórt adamdy jumyspen qamtyp otyrǵan saıramdyq kópbalaly ana Shahtykúl Begzatova da zamandastaryn kásipkerlikpen shuǵyldanýǵa shaqyrdy.

Forým aıasynda «Nur Otan» partııasy Túrkistan oblystyq fılıaly men «Qazaqstannyń isker áıelderi assosıasııasy» qoǵamdyq birlestigi oblystyq fılıaly arasynda partııalyq jobalardy júzege asyrý jáne kópbalaly áıelderge qoldaý kórsetý jóninde memorandýmǵa qol qoıyldy.

Sońǵy jańalyqtar

Elorda «jasyl» aımaqqa ótti

Koronavırýs • Keshe

Uqsas jańalyqtar