Alqaly jıynǵa memlekettik organdardyń, halyqaralyq jáne úkimettik emes uıymdardyń ókilderi, grant alýshylar men jobalardyń benefısıarlary qatysty. Azamattyq bastamalardy qoldaý ortalyǵy – úkimettik emes uıymdardy grantpen qarjylandyrý operatory sanalady. Bul ortalyq memlekettik granttardy azamattyq qoǵam ınstıtýttarynyń múmkindigin áleýmettik salanyń damý máselelerin sheshýge tartý maqsatynda usynady.
– Aqparat jáne qoǵamdyq damý mınıstrligi úkimettik emes sektordy qoldaýǵa únemi daıyn. Qoldaý retinde memlekettik-áleýmettik tapsyrysty nemese granttyq qarjylandyrýdy aıtýǵa bolady. Bıyl Jastar jyly aıasyndaǵy jobalarǵa mán berilse, aldaǵy Volonter jyly aıasynda da aýqymdy jumys atqarylaryna senimdimin. 2020 jyl ár qazaqstandyq azamattan bastap, jekelegen uıymdardyń da sanasyn jańǵyrtý jyly bolmaq. Sondyqtan úkimettik emes sektordyń da belsendilik tanytqany mańyzdy. Eń bastysy ózara syılastyq pen jaýapkershilikti sezine bilý qajet, – dedi Aqparat jáne qoǵamdyq damý vıse-mınıstri Danııar Esın.
Azamattyq bastamalardy qoldaý ortalyǵynyń bıylǵy jumys qorytyndysyn tyńdaýǵa 40-tan astam úkimettik emes uıymnyń ókilderi at basyn burdy. Aıta keteıik, osy jyly 130-dan astam áleýmettik joba usynylyp, sonyń 128-i qoldaý tapty. Osy bastamalardy qarjylandyrý somasy 3,4 mlrd teńgeni qurady. Jastar jyly aıasynda usynylǵan 57 joba júzege asty.
– Jobalar júzege asqanymen, osy jyl asa jaýapkershilikti qajet etti. Jaýapkershilik júgi Azamattyq bastamalardy qoldaý ortalyǵyna ǵana emes, úkimettik emes uıymdarǵa da túskenin alǵa tartar edim. Qıyndyqtar jobalar konkýrsyn ótkizý, bıýdjet qarajatyn ıgerý jáne esep berý kezinde oryn alǵanyn alǵa tartýǵa bolady. Atalǵan ortalyqty transformasııalaý qajettiligine qatysty úkimettik emes uıymdar tarapynan kelip túsken barlyq usynys-tilekter nazarǵa alyndy. Sonymen qatar áleýmettik jobalardy júzege asyrý barysynda paıda bolǵan qandaı da bir máselelerge qatysty jedel sheshim qabyldaı bildik, – dedi Azamattyq bastamalardy qoldaý ortalyǵynyń basqarma tóraǵasy Batıma Mýkına.
B.Mýkınanyń aıtýynsha, osy jyly azamattyq bastamalardyń basym baǵyttaryn, jumysyn, júıesin aıqyndaıtyn birqatar retteýshi qujat qabyldandy. Sondyqtan bıylǵy oń bastamalar aldaǵy jyldarda da laıyqty jalǵasyn tabady.
