BAQ ókilderiniń qatysýymen ótken brıfıngte Sybaılas jemqorlyqqa qarsy is-qımyl agenttigi oblys boıynsha departamentiniń basqarma basshysy Ǵalııa Álimqulova, «Mektepte deıingi uıymdardyń qazaqstandyq assosıasııasy» oblystyq fılıalynyń dırektory, monıtorıngtik top jetekshisi Natalıa Mıshýkova jáne Qazaqstan halyqtyq kommýnıstik partııasy oblystyq fılıalynyń jetekshisi, top múshesi Talǵat Teleýbaev jyl boıy atqarylǵan jumysty saralady.
Osy jyly monıtorıngtik top músheleri bekitilgen jumys josparyna sáıkes 8 otyrys ótkizip, nátıjesinde tıisti oryndarǵa 18 usynys bergen. Top músheleri jalpyǵa mindetti oqý qorynyń qyzmetine monıtorıng júrgizip, bilim basqarmasyna qordan qarajat bólýdiń biryńǵaı standarttaryn jasaý, jalpy bilim beretin mektepterdiń qyzmeti týraly aqparatty qamtıtyn biryńǵaı ınternet-resýrs ázirleý, onda aqparattardyń tolyq ornalastyryp otyrýyn qamtamasyz etý, biregeı esep berý úlgisin ázirlep, qoljetimdi nysanda ınternet resýrsqa ornalastyrý týraly usynys joldaǵan bolatyn. Osyǵan oraı bilim basqarmasy tarapynan qarjy bólinip, biryńǵaı ınternet-resýrs bıylǵy qazan aıynda jumysyn bastady.
Top músheleriniń qatysymen respýblıkalyq jáne jergilikti mańyzy bar joldardyń jaǵdaıy, júrgizilgen jóndeý jumystarynyń sapasy baqylaýǵa alyndy. Sonymen qatar, memlekettik áleýmettik tapsyrystardy qalyptastyrý, ataýly áleýmettik kómek kórsetý baǵytynda monıtorıngter júrgizilip, anyqtalǵan kemshilikter boıynsha tıisti sala basshylaryna usynystar joldandy, onyń oryndalýy baqylaýǵa alyndy, dedi N. Mıshýkova.
Arnaıy monıtorıngtik top músheleri men «Aqmeshit adaldyq alańy» jobalyq keńse qyzmetkerleri birlesip, osy jyldyń 10-14 tamyz aralyǵynda Qorqyt Ata atyndaǵy Qyzylorda memlekettik ýnıversıtetinde ótken magıstratýra bilim berý baǵdarlamalary boıynsha keshendi testileýge qatysyp, memlekettik granttardy bólý barysynda sybaılas jemqorlyq táýekelderiniń aldyn alý sharalaryn júrgizdi.
Alty júz bir úmitkerdiń 588-i qatysqan testileý barysynda 437 uıaly telefon alynyp, 38 úmitkerdiń tyıym salynǵan zattardy (uıaly telefon, shpargalka) qoldanǵany anyqtalyp, aýdıtorııadan shyǵaryldy.
«Adal jol» jobasy aıasynda júrgizilgen is-sharalar barysynda poezǵa bıletsiz mingen 41 jolaýshy anyqtalyp, kóliktik baqylaý ınspeksııasy mamandary jolserikterge qatysty ákimshilik quqyq buzýshylyq týraly 30 hattama toltyrdy.
«Sapaly jol – Adaldyq alańy» jobasy aıasynda departament qyzmetkerlerimen birlese otyryp, avtomobıl joldarynyń problemalyq ýchaskelerine shyqty jáne anyqtalǵan kemshilikter boıynsha arnaıy monıtorıngtiń toptyń kezekti otyrysynda sala basshylaryna usynystar berildi. Soǵan sáıkes, qazir 4 ýchaskeni qaıta jóndeý jumystary júrgizilýde.
