Memlekettik-jekemenshik áriptestik aıasynda salynǵan, jalpy quny 272 mln teńge bolatyn mádenıet úıiniń ashylýyna qala ákimi Nurlybek Nálibaev qatysyp, aýyl turǵyndaryn jyl toǵysyndaǵy jańalyqpen quttyqtady.
Memlekettik – jekemenshik áriptestik arqasynda talaı másele oń sheshimin taýyp jatyr. Sonyń bir dáleli – osy mádenıet úıi. Jańa nysan aýyldyń ónerpaz jastarynnyń juldyzyn jaǵatyn oryn bolatynyna senimdimin. Jańa jyldaryńyz qutty bolsyn!, dedi Nurlybek Máshbekuly.
Aldaǵy ýaqytta bul mádenıet úıinde án, bı, kórkemsóz, dombyra úıirmeleri ashylyp, «Syr Orda» VAA men ájeler ansambli oryn tebedi. On úsh adam turaqty jumyspen qamtylady.
Aıta ketý kerek, aýylda mádenıet úıin salý máselesi buǵan deıin eseptik kezdesýlerde jıi kóteriletin máselelerdiń biri bolatyn. Qala bıligi aýyl turǵyndaryna bergen ýádeni oryndaý úshin jedel sheshimder qabyldap, memlekettik-jekemenshik áriptestik aıasynda ádemi ǵımarat boı kóterdi.
Jalpy, qalamen qatar qalaǵa qarasty eldi-mekenderdiń áleýmettik áleýetin arttyrýda birqatar ekonomıkalyq jobalar júzege asyrylýda.
Jaqynda ǵana Belkól kentinde kásipkerlerdiń demeýshiligimen balalar oıyn alańy men sport kesheni paıdalanýǵa berilse, Táýelsizdik kúni qarsańynda Tasbóget kentiniń ortalyǵynan «Karamel» saýda oıyn-saýyq kesheni qoldanysqa berildi.
