Qasym-Jomart Toqaev maqalada Abaıdyń kóp til bilgenin aıta kele, búgingi urpaqqa shet tilderdi úırený kerektigin aıtady. Damyǵan elderdiń tili men mádenıetin bilý úshin, onyń qyr-syryn uǵyný úshin eń áýeli onyń tilin meńgerý kerek. Aldaǵy ýaqytta Abaıdyń qara sózderi men shyǵarmalary on shaqty tilge tárjimalanatyny erekshe qýantty. Bul arqyly ózge memleketter de Abaı murasymen tanysa alady. Sheteldikter bizdi Abaıdyń eli dep tanyp jatsa nur ústine nur bolar edi. Sondyqtan Abaıdyń taǵylymdaryn birinshi orynǵa qoıý kerek. Bul jaıynda Qasym-Jomart Toqaev maqalasynda baıypty saralaǵan. Bul jaı ǵana uran da naýqanshyldyq ta emes. Rasynda Prezıdent Abaıdyń halqynyń jetilgenin qalaıtyndyǵyn shyǵarmalarynan úzindiler bere otyryp, keremet mysaldarmen baıandaǵan.
Sondaı-aq maqalada Abaı shyǵarmalary arqyly sanany jańǵyrtý kerektigi jazylǵan. Abaıdy tereńdep bilý ásirese jastar úshin qajet ekenin Prezıdent astyn syzyp aıtypty. Menińshe, bul maqala – naǵyz baǵdarlamalyq maqala. Bul – eldi, jastardy tárbıeleıtin taǵylymdy maqala. Úlgi beretin dúnıe. Tereń oı tur, tereń izdenisterge jol siltep tur bul maqala.
Sonymen qatar maqalada mádenı sharalarǵa da erekshe mán beriletini jazylǵan. Aldaǵy ýaqytta negizgi ózegi Abaı taqyrybyna arnalatyn respýblıkalyq jáne halyqaralyq deńgeıde teatr jáne mýzyka festıvaldary ótedi. Maqalada málim bolǵandaı, Abaıdyń týǵan jerindegi tarıhı-mádenı nysandar jańa talapqa saı jańǵyrtylyp, uly aqynnyń mereıtoıyna keletin jurtshylyqqa qolaıly jaǵdaı jasalatyn bolady. Sóz sońynda Memleket basshysy Abaıdy eń áýeli óz elimizde tolyq tanyp, sodan keıin shetelge tanytýymyz qajet ekenin aıtady. Ol úshin ǵalymdar atsalysý kerek degendi alǵa tartyp otyr.
Ádil AHMETOV,
Fılologııa ǵylymdarynyń doktory,
professor, qoǵam qaıratkeri
