Aımaqtar • 10 Qańtar, 2020

Kendirlide sý tushytý zaýyty salynbaq

50 ret kórsetildi

«О́zenmunaıgaz» AQ men «QMG Injınırıng» JShS («QazMunaıGaz» UK AQ enshiles uıymdary) Jańaózen qalasynyń ákimdigimen ózara túsinistik jáne yntymaqtastyq týraly memorandýmǵa qol qoıdy. Bul týraly «QazMunaıGaz» UK AQ jurtshylyqpen baılanys departamenti habarlady.

Qol qoıylǵan qujat Qazaqstan Respýblıkasynyń Premer-Mınıstri A. Mamınniń 2019 jylǵy 18 qyrkúıektegi hattamalyq tapsyrmasyna sáıkes sý tushytý zaýytyn salý boıynsha «QMG Injınırıng» JShS ázirlep jatqan tehnıkalyq-ekonomıkalyq negizdemeni áleýmettik joba retinde qaıta saralaýdy kózdeıdi. Tıisinshe, Jańaózen qalasynyń turǵyndaryn uzaq ýaqyt boıy aýyz sýmen qamtýdyń talaptaryna saı keletin sýdyń sapasyna tehnıkalyq tapsyrma ózgertildi. Sý tushytý zaýyty Mańǵystaý oblysynyń «Kendirli» demalys aımaǵy mańynda «QazMunaıGaz» ulttyq kompanııasynyń qarajaty esebinen salynady dep josparlanýda. Zaýyttyń boljamdy qýaty táýligine 50 myń tekshe metr sýdy quraıdy. Qazirgi ýaqytta Jańaózen qalasy Qıǵash ózeninen Edil sýyn 2000 shaqyrym qashyqtyqtan tasymaldaý arqyly aýyz sýmen qamtamasyz etilip otyr.

Mańǵystaý oblysynda sý tapshylyǵy eń ózekti másele bolyp tabylady. Sebebi, óńir jartylaı shóleıt aımaqta ornalasqan. Onyń sý resýrstary shekteýli. «QazMunaıGaz» júıesine kiretin «Astrahan-Mańǵyshlaq» sý qubyry munaı-gaz óndirýshi kásiporyndarynan bólek, Edil ózeniniń sýymen jergilikti halyqty, ónerkásip nysandaryn, kommýnaldyq jáne bıýdjettik uıymdardy, aýyl sharýashylyǵy ónimderin óndirýshilerdi de qamtamasyz etýde. Alaıda, halyq sanynyń ósýine jáne jańa kásiporyndardyń qurylýyna baılanysty óńirdegi sýdy tutyný kólemi de artyp keledi. Osynyń saldarynan aýyz sýmen qamtý júıesiniń jaqsarýyna qaramastan, sý qubyrynyń qýaty jetkiliksiz.

Budan qosa, QMG jalǵyz sý qubyry ǵana emes, sondaı-aq sý tushytý qondyrǵylarynyń kómegimen de óńirdi sýmen qamtyp otyr. Qazirgi ýaqytta Qarajanbas ken ornynda sý tushytý zaýyty salynýda. Bul zaýyt óńir úshin Edil sýynyń táýligine 17 myń tekshe metrin bosatýǵa múmkindik beredi.

«QazMunaıGaz» kompanııalar toby óńirlerde óz qyzmetin júrgize otyryp, óziniń jaýapkershiligin jete túsinedi. Kompanııa Mańǵystaý oblysynyń áleýmettik-ekonomıkalyq turǵydan qarqyndy damýyna múddeli. Sý tushytý qondyrǵylaryn salý Mańǵystaý oblysynyń ǵana emes, sonymen birge Atyraý óińiriniń halqy úshin de jaǵymdy áser etetini sózsiz.

Sońǵy jańalyqtar

Uqsas jańalyqtar