Alakóldiń «Qaıyńdy» et óńdeý zaýytynyń ónimderi naryqqa jol tartady

Aımaqtar • 11 Qańtar, 2020

Alakóldiń «Qaıyńdy» et óńdeý zaýytynyń ónimderi naryqqa jol tartady

90 ret kórsetildi

Almaty oblysynyń ákimi Amandyq Batalov Alakól aýdanyna jumys saparymen kelgen Parlament Májilisiniń depýtattary Ersultan Bekturǵanov pen Marat Bopazovty birneshe nysanǵa bastap bardy. Depýtattar «Zhersu» ınvestısııalyq-óndiristik korporasııasynyń agrarlyq obektileriniń jumys jaǵdaıymen tanysty, - dep habarlaıdy Almaty oblysy ákiminiń baspasóz qyzmeti.

Egemen Qazaqstan

Resmı qonaqtarǵa «Zhersu» ınvestısııalyq-óndiristik korporasııasy baqylaý keńesiniń tóraǵasy Baýyrjan Ospanov aldymen Arqarly aýyldyq okrýgi aýmaǵyndaǵy «Alakól Asyl jylqysy» JShS-nyń jylqy fermasyn kórsetti. Onyń aıtýynsha, ótken jyldyń qarashasynda iske qosylǵan jylqy tuqymyn asyldandyrý maqsatyndaǵy bul sharýashylyqqa 1 mlrd. teńgege jýyq ınvestısııa salynǵan. Jobanyń qazirgi birinshi kezeńinde munda 10 myń bas jylqy ákelinip, baǵylyp otyr. Olar negizinen Reseıden jáne elimizdiń Mańǵystaý, Qaraǵandy, Shyǵys Qazaqstan oblystarynan ákelingen. Reseıdiń Altaı, Barnaýyl óńirleriniń qysy qatal, jazy jaıly tabıǵatynyń Alakól klımatyna uqsastyǵy syrttan ákelingen jylqylardy jersindirýde eshqandaı qıyndyqtyń týyndamaýyna zor yqpal etken. Al jobanyń ekinshi kezeńinde asyl tuqymdy jylqynyń sanyn 20 myń basqa jetkizý josparlanyp otyr. Olardyń barlyǵy da negizinen et pen sút baǵytyn órkendetýge baǵyttalmaq. Fermadaǵy mal baǵý JPS-tiń kómegimen áldeqaıda jeńildetilgen. Qazirgi kezde munda túıe ósirý de qolǵa alynǵan.

Búgingi kúni munda 56 adam jumys isteıdi. Bul fermada jumysshylarǵa barlyq jaǵdaılar jasalǵan. Olar úshin jataqhana salynyp, arnaıy turǵyn úıler de paıdalanýǵa berilgen. Tipti kınoteatr men kitaphana da jumys istep tur. Balalar oınaıtyn alań jasalyp, ashanasynda jumysshylarǵa tegin tamaq uıymdastyrylǵan. Osynyń bári sharýashylyqtaǵy mamandardyń ózine júktelgen mindetterin jaýapkershilikpen, sapaly oryndaýlaryna múmkindik berip otyr.

Munan soń resmı qonaqtar korporasııanyń Budyr aýylynda ornalasqan «Qaıyńdy» JShS-nyń mal bordaqylaý alańy men et óńdeý zaýytyna atbasyn buryp, sehtaryn aralap kórdi.

Seriktestiktiń úıestirýshisi Asqar Muqashevtiń aıtýyna qaraǵanda, mundaǵy mal bordaqylaý alańy 5 myń bas iri qara semirtýge arnalǵan. Qazir Gereford jáne Angýs tuqymdy 4500 bas bar, iske qosylǵaly 500 bas iri qara soıylǵan. Zaýyttyń mal soıý sehynda bir kúnde 60 basqa deıin mal soıylady. Al shujyq sehynda táýligine 6 tonnaǵa deıin daıyn ónim óndiriledi. Bul jerden shujyqtyń 18 túrin taba alasyz. Qazirgi kezde ónimniń saýda markasy daıyndalýda, bul «Qaıyńdy» seriktestiginiń shujyqtaryn otandyq saýda sórelerinen kóretin kún de alys emes degen sóz. onymen qatar daıyn ónimdi alǵashqyda Qytaı men Reseıge eksporttaý mejelenip otyr. Jalpy et óńdeý zaýyty et ónimderin óńdeý men eksporttaýǵa baǵyttalǵan.

Oblys ákimi Amandyq Batalov mal sharýashylyǵynyń osyndaı irgeli nysandarynyń óńirdiń et óndirisin, eksporttyq múmkindikterin ulǵaıtýǵa zor yqpal etetinin aıtty.

- Osyndaı aıtýly jobalardy ǵylymı-ádistemelik ortalyq retinde kórsetýge bolady. «Myń ret estigennen bir ret kórgen artyq», - degen. Búgingi aralaǵan nysandar agrarlyq salada tájirıbe almasý, úırený alańy bolýǵa ábden laıyq. Biz iri bıznesmenderdiń kómegimen osyndaı óte paıdaly, zaman talabyna saı jobalardy júzege asyrý arqyly oblysqa ınvestısııa tartý jumystaryn odan ári de jalǵastyramyz, - dedi A. Batalov.

Depýtattar da óz kezeginde mundaı nysandardyń mal sharýashylyǵyn órkendetýdegi úlesine oń baǵa berdi.

Atap ótsek, osy úsh nysan da - «Alakól Asyl jylqysy» JShS-nyń jylqy fermasy, «Qaıyńdy» JShS-nyń mal bordaqylaý alańy men et óńdeý zaýyty «Zhersu» ınvestısııalyq-óndiristik korporasııasynyń ınvestısııa salýy nátıjesinde júzege asyrylǵan.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz