Degenmen osy ıgiliktiń bárin qalalyqtar tegis kórip otyrmaǵanyn aıta ketý kerek. Ásirese temir joldyń arǵy betindegi aýmaq turǵyndary úshin túrli demalys oryndary men sporttyq nysandardyń salynýy oryndalýy qıyn armanǵa aınalyp otyr. Qazir qala turǵyndarynyń sany 300 myńnyń ústine shyqsa, sonyń 30 myńǵa jýyǵy osy aýdanda turady. El aýzynda Shanhaı atalyp ketken aýdanda orta bilim beretin 4 mektep bar. Solardyń irisi № 222 orta mektep. Atshaptyrym aýlanyń bir shetinde balalar tartylatyn temirden basqa sporttyq qurylǵy atymen joq. Mektep dırektory Maqsut Múkeev bul kóptiń kókeıindegi máselege aınalǵanyn aıtady. Bilim oshaǵyndaǵy sport zaly tym tar. Qystyń kúnderi bastaýysh synyp oqýshylary deneshynyqtyrý pánin mektep dálizinde ótkizedi. Jer qara, kún jylynyń ózinde de bala úshin boı sergitip, oınaıtyn alań joq.
Mektep mańaıynda turatyn turǵyndarmen de tildestik. Olardyń kópshiligi balalaryn bir mezgil oınatý úshin qala ortalyǵyna aparatynyn aıtady.
– Biz №222 mekteptiń janynda turamyz. Balalarym da osy bilim oshaǵynda oqydy, qazir nemerelerim baryp júr. Mańaıymyzda balalardy jan-jaqty damytatyn mádenı, sporttyq, oqý-saýyqtyrý keshenderi, balalarǵa arnalǵan oıyn alańdary, jattyǵý alańdary atymen joq. Bári qalanyń ortalyǵynda ornalasqan. Balalarymyzdy jetektep, ortalyqqa aparyp oınatamyz. Qalanyń bir shetinen ekinshi shetine qoǵamdyq kólikpen jetýdiń qıyndyǵyn osynda turatyn árkim-aq biler. Keıde aptalap úıden shyqpaıtyn kezderi bolady. Mekteptiń aýlasynda bala qyzyǵatyn eshteńe joq, sosyn basqa dúnıege alańdap, bir bálege ushyrap qalar dep qaýiptenemiz. О́mirlik tájirıbemnen bilemin, oıyny qanbaǵan baladan oıly azamat shyǵa qoıady deý qıyn. Meniń jáne kórshilerimniń tilegi – №222 mekteptiń aýlasynan sport keshenin, shaǵyn fýtbol, jattyǵý jáne balalar oınaıtyn alańdar salyp berse, – deıdi zeınetker Álııa Rshymbet.
Osy aýdannyń taǵy bir turǵyny Gúljanat Shákıeva de telefonǵa telmirgen balalardyń kóńilin aýlaıtyn oryn joq ekenin qynjyla aıtyp otyr.
Bul aýmaqta sporttyq nysandardan jalǵyz Jalańtós Bahadúr atyndaǵy olımpıadalyq rezervtiń oblystyq mamandandyrylǵan mektep-ınternaty ǵana bar. Biraq bul mektepte bolashaq sportshylar ǵana jattyǵady.
Osy aýdandaǵy № 212, 253 jáne 43-mektepter aýlasynan da kózge túser eshteńe taba almadyq.
Máselege oraı qalalyq turǵyn úı-kommýnaldyq sharýashylyǵy, jolaýshylar kóligi, avtomobıl joldary jáne turǵyn úı ınspeksııasy bólimine jolyqtyq. Bólim basshysynyń orynbasary Abzal Rysbek sol aýdandaǵy kópqabatty úıler aýlasynan eki sporttyq alań salynǵanyn aıtady. Jaqyn mańdaǵy mektepter kútip ustaıdy degen oımen ony qalalyq bilim bóliminiń balansyna ótkizipti. Biraq durys baqylaý bolmaǵandyqtan tozǵan alańdardy jaqynda qaıtadan óz qaraýlaryna alǵan. Qazir qala boıynsha osyndaı 152 alań bar, byltyr olardy ustap turý úshin bıýdjetten 16 mln teńge bólingen.
– Mektepter aýlasyna alań salý qalalyq bilim bóliminiń mindeti. Al jalpy aýdanǵa kelsek, sporttyq, oıyn alańdary úshin bos jatqan jer telimi qajet. Salyna qalǵan kúnniń ózinde de ony bir mekeme óz qaraýyna alyp, alań jaǵdaıyn únemi baqylap otyrýy kerek, – deıdi bólim basshysynyń orynbasary.
«Arǵy betten salyndy» degen alańdardy da baryp kórdik. Ekeýiniń de qorshaǵan tory setinep, bala oınaıtyndaı jaǵdaıy qalmaǵan eken. Taımanov kóshesindegi alańǵa bala jibermek túgili, janynan júrgizýge bolmaıdy. Qısaıyp turǵan qabyrǵasy qulasa, astynda qalary anyq.
Aıtpaqshy, qala ákimdiginiń ókili bul máseleniń aýmaq turǵyndarymen birlese otyryp sheshilýi múmkin ekenin aıtyp qaldy. Bizge osy sóz óz aýdanynan bala oınaıtyn alaqandaı alań tappaǵan turǵyndardyń úmitin oıatatyndaı kórinip tur.
QYZYLORDA
