Hakimniń mereıtoıyna oraı, Sh.Ýálıhanov atyndaǵy Jambyl oblystyq ámbebap-ǵylymı kitaphanasynda «Abaı murasy» atty turaqty kitap kórmesi uıymdastyryldy. Munda Abaı shyǵarmalary, aqyn jaıly jazylǵan kitaptar, maqalalar, ǵylymı zertteý eńbekteri qoıylǵan. Oıshyldyń mol murasyna qyzyǵýshylar atalǵan kórmege kóptep kelýde. Kez-kelgen oqyrman kitaphanaǵa kelip, uly aqynnyń ulaǵatty muralarymen, ol týraly jazylǵan eńbektermen tanysa alady. Sondaı-aq atalǵan kórme qatarynda Prezıdent Qasym-Jomart Toqaevtyń jaqynda respýblıkalyq «Egemen Qazaqstan» gazetinde jarııalanǵan «Abaı jáne HHI ǵasyrdaǵy Qazaqstan» jáne Prezıdenttiń Baspasóz hatshysy Berik Ýálıdiń «Abaı men Alash» atty maqalalary da bar.
Kitaphana qyzmetkerleri aldaǵy ýaqyttarda Abaı Qunanbaıulynyń óleńderi men qarasózderin oqyp, ánderin oryndap, oblystyń barlyq kitaphanalaryna chellendj estafetasyn joldaıdy. Sondaı-aq kitaphanashylar jyl boıy olardy feısbýk, ınstagram áleýmettik jelilerine turaqty túrde jarııalap turatynyn aıtty. «Kitaphananyń kitap qoryndaǵy qundy basylymdardy paıdalana otyryp, hakim Abaıdyń kitaptary men aqyn týraly jazylǵan eńbekterden beksteıdj ázirlenedi. Olar da áleýmettik jelilerge jyl boıy jarııalanyp turatyn bolady. Abaı poezııasy – danalyqtyń, mahabbat pen adaldyqtyń poezııasy, onyń mol murasyn jańasha uǵyný jalǵasyp, kitaphana óz oqyrmandaryna Abaı murasyn nasıhattaý jumysyn tyńǵylyqty túrde jalǵastyra beredi» deıdi kitaphana dırektory Elmıra Abdınova.
