Búkilálemdik boksshylar uıymy (WBO) jartylaı aýyr salmaqta jańa chempıondy anyqtaý maqsatynda tórt boksshy arasynda jekpe-jek ótkizýdi jón dep uıǵardy. Osy sheshimge saı jartylaı fınaldyq básekeler meksıkalyq Hılberto Ramıres pen kolýmbııalyq Eleıder Alvares jáne reseılik Ýmar Salamov pen Maksım Vlaksov arasynda ótedi. Osy kezdesýlerde jeńiske jetkenderi aıtýly nusqanyń altyn belbeýi úshin talasady.
Joǵaryda atalǵan jigitterdiń barlyǵy da myqty. Máselen, Hılberto Ramıres áli eshkimnen jeńilgen emes. 28 jastaǵy Meksıkanyń marqasqasy 40 jekpe-jek ótkizip, 26 qarsylasyn esinen tandyrdy. 34 jastaǵy Eleıder Alvares 25 kezdesýdiń tek bireýinde ǵana jeńilistiń kermek dámin tatty. 13 básekeni merziminen buryn aıaqtady. 25 jastaǵy Ýmar Salamovtyń da kórsetkishi dál sondaı. Sheshenstannyń týmasy 19 básekelesin nokaýtqa jiberdi. 33 jastaǵy Maksım Vlasov sharshy alańǵa 48 márte kóterilip, 45 ret jeńis toıyn toılady. 26 kezdesýde aıqyn basymdyqqa ıe boldy.
