Zııaly qaýym ókilderi jıylǵan sharada oblys ákiminiń orynbasary Naýryzbaı Baıqadamov ult rýhanııatynyń besigi sanalatyn óńirdegi bul bastama ózge aımaqtar úshin úlgi bolatynyn atap ótti.
– Búgin qolymyzǵa tıgeli otyrǵan úsh kitap ta kóp izdenis pen eńbektiń arqasynda jaryq kórip otyrǵan qundy dúnıeler. «Rýhanı jańǵyrý» baǵdarlamasy sheńberinde baspa júzin kórgen bul týyndylar ótkenimizdi tanymaqqa talap qylǵan oqyrmannyń tanymyn baıytary anyq, – dedi Naýryzbaı Seıitqalıuly.
Oblystyq mádenıet, arhıvter jáne qujattama basqarmasy ázirlegen «Qasıetti Qazaqstan» ensıklopedııasynyń úshinshi tomyna Syr óńirindegi saq, oǵyz, qańly taıpalary, Qypshaq memleketi tusyndaǵy strategııalyq mańyzdy qalalar men sáýlet óneri eskertkishteri týraly derekter toptastyrylǵan. Kitapqa jalpyulttyq jáne óńirlik máni bar 84 nysan enip otyr.
Al «Alashtyń asyl murasy» jınaǵyna Syr súleıi Turmaǵambet Iztileýulynyń el arasynan jınaǵan túrli ádebıet úlgileri, kóne arab álipbıinde hatqa túsirgen shyǵarmalary jáne Alash qaıratkerleriniń XX ǵasyr basyndaǵy týyndylary toptastyrylǵan. Kitapty qurastyrǵan belgili túrkitanýshy ǵalym, fılologııa ǵylymdarynyń kandıdaty Serikbaı Qosan.
«Syr boıynyń sakraldy eskertkishteri: mıfter, ańyzdar, hıkaıalar» jınaǵy Elbasynyń «Bolashaqqa baǵdar: rýhanı jańǵyrý» atty strategııalyq maqalasyndaǵy «Qazaqstannyń kıeli jerleriniń geografııasy» arnaýly jobasy aıasynda ázirlengen. Ár kezeń men túrli taqyryptaǵy folklorlyq muralardy bir arnaǵa toǵystyrǵan qundy jınaqqa byltyr «Syr medıa» JShS bas dırektory Amanjol Ońǵarbaevtyń bastamasymen uıymdastyrylǵan etno-folklorlyq jáne arheografııalyq ekspedısııa materıaldary paıdalanylǵan. Bul bastamaǵa tarıh ǵylymdarynyń kandıdaty Nurlybek Myńjas basqaratyn oblystyq «Rýhanı jańǵyrý» ortalyǵynyń mamandary da úlken úles qosqanyn aıta keteıik. Jergilikti ólketanýshylar málimetteri, oblystyq jáne aýdandyq mýzeıler men arhıv derekteri, Almaty, Tashkent qalalaryndaǵy sırek qorlar materıaldary, tarıhı fotosýretter toptastyrylǵan kitapqa ótken ǵasyr basynda jaryq kórgen I.Kastaneniń, orta ǵasyr oıshyly Jamal Qarshıdiń, Hıýa tarıhshysy Ábilǵazy Bahadúr hannyń eńbekterinen Syr boıy eskertkishteri men kóne qalalarǵa qatysty materıaldar mátinderi enip otyr.
Tusaýkeser rásiminde fılosofııa ǵylymdarynyń doktory Baımyrza Qojamberlıev, jazýshy Saılaýbaı Jubatyruly, Turmaǵambet shaıyrdyń nemeresi Shalqyma Ábdiraýyqova sóz alyp, aımaqtyń mádenı ómirindegi aıtýly jańalyqqa tilektestikterin bildirdi.
QYZYLORDA
