Aımaqtar • 24 Qańtar, 2020

Jyl basynan beri 25 myń kóp balaly otbasy jańa járdemaqy túrin rásimdedi

52 ret kórsetildi

Qazaqstanda kóp balaly otbasylarǵa arnalǵan járdemaqynyń jańa túrin jyl basynan beri 25,4 myń otbasy rásimdep úlgerdi. Onyń ishinde 11,8 myńnan astam otbasy járdemaqyny alǵash ret rásimdese, 13,7 myńy qaıta esepteýge qujat ótkizgender.

-Kóp balaly otbasylar halyqqa qyzmet kórsetý ortalyǵyna jeke tólqujattarymen kelip tıisti járdemaqyny rásimdeı alady. Osyǵan deıin járdemaqy alǵan otbasylar jańa járdemaqy túrin alýshylar tiziminde bar-joǵyn 1411 call-ortalyǵy men QR Eńbek jáne halyqty áleýmettik qorǵaý mınıstrliginiń www.enbek.gov.kz saıty arqyly da teksere alady, deıdi «Azamattarǵa arnalǵan úkimet» memlekettik korporasııasynyń basqarma tóraıymy Ásemgúl Baltasheva.

Jalpy alǵanda, 1 qańtardaǵy jaǵdaı boıynsha 368,9 myń otbasyǵa memlekettik járdemaqy taǵaıyndalǵan, onyń 246 myńy – buǵan deıin arnaýly memlekettik járdemaqy alǵandar.

Aımaqtyq bóliniste jyl basynan beri járdemaqynyń rásimdelýine Túrkistan oblysynan kóp ótinish qabyldanǵan. Odan keıin Almaty oblysy men Shymkent qalasynyń turǵyndary.

Esterińizge salaıyq, 2020jyldan bastap otbasynda birge turatyn kámeletke tolmaǵan tórt jáne odan da kóp balalary, onyń ishinde kámelet jasyna tolǵannan keıin bilim berý uıymdaryn támamdaǵanǵa deıin (23 jasqa deıin) orta, tehnıkalyq jáne kásiptik, orta bilimnen keıingi, joǵary jáne joǵary oqý ornynan keıingi bilim berý uıymdarynda oqıtyn balalary bar otbasyna aı saıyn taǵaıyndalatyn memlekettik járdemaqy kólemi: 4 balasy barlarǵa – 42 496 tg, 5 balaǵa – 53 127 tg, 6 balaǵa – 63 757 tg, 7 jáne odan kóp balaǵa – 74 388 tg.

Sońǵy jańalyqtar

Uqsas jańalyqtar