Máselen, oblystyq densaýlyq saqtaý basqarmasynyń joǵaryǵa bergen esebindegi málimet pen jergilikti jerdegi naqty oqıǵalardyń arasynda alshaqtyq baıqalǵan. Bul istiń anyq-qanyǵyn zerdelegen Densaýlyq saqtaý mınıstrligi statıstıkalyq tirkeýden óreskel zań buzýshylyq tapqan. Iаǵnı, aımaqtaǵy sábılerdiń shetineý oqıǵalaryn saralaǵan mınıstrlik ókilderi buǵan óńirdegi qajetti maman tapshylyǵy men dárigerlerdiń jaýapsyzdyǵy sebep bolǵan degen sheshimge kelipti. Bul jaıdy oblysta ótken densaýlyq saqtaý máseleleri jónindegi kóshpeli otyrysta vıse-mınıstr Lázzat Aqtaeva da synǵa alǵan edi.
Málim bolǵan derek boıynsha, mınıstrlik tekserýi oblys perzenthanalarynyń ana men bala ómirin qorǵaýǵa daıyndyǵy nashar ekenin anyqtaǵan, onyń ishinde qajetti medısınalyq qural-jabdyq pen mamandardyń jetispeýshiligi ótkir turǵan kórinedi. Mysaly, perzenthanalar men aýrýhanalardy suranysqa saı neonatolog-dárigerlermen qamtamasyz etý 50 paıyz da jetpeı otyr. Al qajetti qural-jabdyqpen jaraqtandyrý 72,8 paıyz deńgeıinde eken. Dári-dármek tapshylyǵy da baıqalǵan. Sonyń kesirinen jas bosanǵan ana men dúnıe esigin ashqan sábıdiń ómirine tóngen qaýiptiń aldyn alý múmkin bolmaı otyr.
Sondaı-aq tekserý barysynda oblysta tıisti medısınalyq sertıfıkaty joq otyzǵa jýyq mamannyń emhanalar men aýrýhanalar jumys istep júrgeni anyqtalǵan. Al oblystyń medısınalyq uıymdarynyń 27 paıyzy ǵana ulttyq standarttarǵa saı akkredıtasııadan ótse, 61 mekeme sanıtarlyq-epıdemıologııalyq talap turǵysynan kórine almaǵan eken.
Aıtpaqshy, oblystyq densaýlyq saqtaý basqarmasynyń dereginshe, 2019 jyly ana men bala ólimine qatysty 12 oqıǵa tirkelgen. Taldaý nátıjeleri aımaq boıynsha ajaldyń aldyn alýǵa daıyndyqtyń tómendigin kórsetip, qaýiptilik deńgeıiniń 5,5 esege óskenin kórsetken. Jeti oqıǵa boıynsha arnaıy zertteý júrgizilip, onyń beseýi medısına qyzmetkerleriniń salǵyrttyǵynan bolǵandyǵy anyqtalypty. Al eki jaǵdaıdyń aldyn alýǵa dárigerler dármensiz bolǵan. Al ana men bala ómirin saqtaýdaǵy salǵyrttyqqa jol bergen laýazymdy basshylardyń ekeýi jumystan bosatylyp, 5 adamǵa qatań sógis jarııalanypty.
