«Ár óńir el ekonomıkasyn damytýda mańyzdy ról atqarady. 2019 jyldyń qorytyndysy boıynsha 7 kórsetkish boıynsha 8 óńirde — Shyǵys Qazaqstan, Jambyl, Qyzylorda, Atyraý, Almaty, Batys Qazaqstan jáne Soltústik Qazaqstan oblystarynda, sondaı-aq Almaty qalasynda áleýmettik-ekonomıkalyq damýdyń negizgi kórsetkishteri boıynsha ozyq ósý qarqyny baıqaldy», dedi Asqar Mamın.
Sondaı-aq ol kóptegen kórsetkishter boıynsha artta qalǵan 5 óńirdi atady. Úkimet basshysynyń málimetinshe, Qostanaı, Mańǵystaý jáne Pavlodar oblysy, Shymkent jáne Nur-Sultan qalasynda áleýmettik-ekonomıkalyq damýdyń negizgi kórsetkishteri salystyrmaly túrde tómen bolǵan. Al qalǵan Qaraǵandy, Aqmola, Aqtóbe, Túrkistan oblysy syndy 4 aımaq ortasha kórsetkish kórsetken.
«10 óńirde áleýmettik mańyzy bar azyq-túlik taýarlary ortasha respýblıkalyq baǵa deńgeıinen (10,4%) asyp túsken. Baǵanyń edáýir ósýi Atyraý (+13,2%), Pavlodar (+13,1%), Nur-Sultan (+12,9%), Almaty (+12,6%), Oral (+12,5%) jáne Kókshetaý (+12,3%) qalalarynda tirkelgen. Osyǵan baılanysty ımportqa táýeldilikti tómendetý jáne qolda bar retteý quraldaryn qoldaný arqyly áleýmettik mańyzy bar azyq-túlik taýarlarynyń baǵasyn baqylaýǵa erekshe nazar aýdarylatyn bolady», - dedi Premer-Mınıstr.
