Qazaqstan Qarýly Kúshteri Áýe qorǵanysy kúshteriniń bas qolbasshysy, avıasııa general-maıory Nurlan Ormanbetov Almaty, Shymkent, Aqtaý garnızondaryndaǵy avıasııa áskerı bólimderiniń jaýyngerlik ázirligine josparly tekserý júrgizdi.
Tekserý barysynda Jetigen garnızonynda áskerı bólim komandırlerimen joıǵysh bombalaýshy MıG-27 jáne kóp maqsatty joıǵysh Sý-27 sııaqty úshinshi jáne tórtinshi býynnyń kóp fýnksııaly ushaqtarynda maqsatty ushýlar oryndaldy. Osy ushýlar arqyly ushqyshtar joǵary turǵan qolbasshylyq aldynda ushý tehnıkasy men áýe navıgasııasyndaǵy sheberlikterin kórsetti.
– Bizdiń ushqyshtar ushý daǵdysyn, jaýyngerlik ázirligin arttyryp, olarǵa júktelgen Otanymyzdyń áýe keńistigin kúzetý jáne qorǵaý jónindegi kez kelgen jaýyngerlik mindetti oryndaýǵa daıyn bolýy tıis, – dedi Áýe qorǵanysy kúshteriniń bas qolbasshysy Nurlan Ormanbetov. – Avıasııa – beıbit kúnderi jaýyngerlik kezekshilik atqaratyn óte kúrdeli ásker tegi. Onyń múmkindikteri óte aýqymdy. Biz Áýe qorǵanysy kúshteri daıarlyǵynyń biryńǵaı ádistemesin basshylyqqa alyp, qoıylǵan mindetti oryndaýǵa sanaly túrde qaraýdy árbir áskerı qyzmetshiden qatań talap etýimiz kerek. Jaýyngerlik mashyqtaný jáne ushý daıarlyǵy júıelerin jetildire túsýimiz qajet.
Búgingi tańda jaýyngerlik kezekshilikti sapaly atqarýǵa, jaýyngerlik daıarlyq boıynsha sabaqtar ótkizýge, avıasııalyq bólimder jeke quramynyń turmys-tirshiligi úshin barlyq jaǵdaılar jasalǵan.
«Egemen-aqparat».
