Qasıetti Ramazan aıy bastalǵanda «Áziret Sultan» meshitiniń ujymy áleýmettik jaǵdaıy tómen, kóp balaly otbasylardyń balalaryn mektepke daıyndaý aksııasyn jarııalap, qaıyrymdy jandardy osynaý sharaǵa úles qosýǵa shaqyrǵan bolatyn. Mine, sol ıgi shara Qadir túni qarsańynda – 3 tamyzda ótti.
Qasıetti Ramazan aıy bastalǵanda «Áziret Sultan» meshitiniń ujymy áleýmettik jaǵdaıy tómen, kóp balaly otbasylardyń balalaryn mektepke daıyndaý aksııasyn jarııalap, qaıyrymdy jandardy osynaý sharaǵa úles qosýǵa shaqyrǵan bolatyn. Mine, sol ıgi shara Qadir túni qarsańynda – 3 tamyzda ótti.Uıymdastyrýshylardyń aıtýynsha, ár balaǵa kıim-keshek, sporttyq forma, sómke, qalam, dápter sııaqty oqý qural-jabdyqtaryn satyp alýǵa shamamen 30 myń teńge jumsalǵan. Kıim-keshekter balalardyń jas mólsherine qaraı úlestirildi. Sóıtip, osynaý ıgi sharadan soń áleýmettik jaǵynan az qamtylǵan jáne kóp balaly otbasylardan shyqqan 300-den astam bala jańa oqý jylyna tap-tuınaqtaı daıyn boldy.
– Bul shara elimizge, dinimizge janashyr azamattardyń qoldaýymen júzege asyp otyr, – dedi «Áziret Sultan» meshitiniń bas ımamy Qaırat Joldybaıuly. – Tipti, keıbir dúken ıeleri aksııaǵa óz úlesterin qosý úshin taýarlaryn ádettegiden tómen baǵamen berdi. Osy bastamaǵa atsalysqandardyń barlyǵyna Alla razy bolsyn!
Qazirgi zamanda balalardy mektepke daıyndaýdyń kóp shyǵynǵa túsetini belgili. Al turmysy tómen jáne kóp balaly otbasylar úshin bul, tipti, kúrmeýi qıyn is desek te bolady. Máselen, 8 bala ósirip otyrǵan 36 jastaǵy Marjan Álıqyzynyń (sýrette) 6 balasy mektep jasynda. Baspanasy joq otbasy úshin 6 balany birdeı mektepke daıyndaý ońaı ma?! Osy sharanyń arqasynda bul máseleniń túıinin sheship qaıtqan Marjan apaı bylaı dedi:
– 2009 jyly Jambyl oblysy, Baızaq aýdany, Jetibaı aýylynan 6 balamyzben kóship keldik. Qyzdarym Bıbinur men Aısha Astanada dúnıege keldi. Joldasym qubyr zaýytynda jumys isteıdi. Shyny kerek, tapqany bir aılyq páteraqy men iship-jemnen artylmaıdy. Aksııa týraly estip, ótinish bildirdik. Kóp keshikpeı meshit qyzmetkerleri habarlasyp, jańa oqý jylyna kerek-jaraqtarymyzdy túgendeýge kómektesetinderin aıtty. Qýanyp otyrmyz. Qaıyrymdy is-sharaǵa atsalysqan azamattarǵa Allanyń nury jaýsyn, jomart jandar kóbeıe bersin degim keledi.
Aksııa aıasynda tegin kıim-keshek, oqý qural-jabdyqtary tek qazaq balalaryna ǵana emes, ózge de ult ókilderiniń balalaryna úlestirildi. Qazaqstan musylmandary dinı basqarmasynyń uıytqy bolýymen mundaı shara ózge meshitterde de jyl saıyn ótkizilip turmaq.
Almas MANAP,
«Egemen Qazaqstan».
ASTANA.
Sýretti túsirgen avtor.
