Búginde Muhtar Ábilázovtiń tártip saqshylarynyń qolyna túsip, qulyp astyna alynǵanyna bir aptadaı ýaqyt boldy. Biz munyń birqatar jaı-japsaryn elimiz Bas prokýratýrasy baspasóz qyzmetiniń derekteri boıynsha gazetimizdiń 3 tamyz kúngi nómirinde jarııalanǵan «Ábilázov ustaldy» degen maqalada baıandap bergenbiz.
Osy eki aralyqta Muhtar Ábilázov torǵa túsken el – Fransııanyń Eks-an-Provans qalasynyń soty óziniń oǵan qatysty eń alǵashqy sheshimin de shyǵaryp úlgerdi. Olar ótken beısenbi kúni qazaqstandyq BTA banktiń eks-qojaıynyn tutqynnan shyǵarmaı, ustap otyra berý haqyndaǵy mámilege toqtady. Osylaısha Ábilázovtiń sheteldik advokattarynyń ony qanshalyqty kólemde bolsa da, surastyrylǵan baǵasyndaǵy aqshanyń kepildigimen bostandyqqa shyǵara turý týrasyndaǵy usynysy qabyl alynbady. Bálkim, bul bir esepten durys ta bolǵan shyǵar. Áıtpese, múddeli bireýlerdiń osy sátti paıdalanyp, onyń ómirine qastandyq jasaýy da yqtımal ǵoı...
Endi ótkendi bir eske túsirip ótsek, sózdiń basyn 31 shilde kúni saǵat úshtiń shamasynda Fransııanyń ońtústigindegi Mýan-Sartý derevnıasynda asa qymbat aqshaǵa jalǵa alynǵan aýmaǵy atshaptyrym vıllada turyp jatqan Muhtar Ábilázovti qolǵa túsirýge arnalǵan uzaq ýaqyttan bergi operasııanyń sátti aıaqtalǵanynan bastar edik. Qazir birqatar sheteldik buqaralyq aqparat quraldary jazyp jatqandaı, burynǵy bankırdiń júrgen-turǵan qadamdaryn ańdýǵa sol kúnderi biraz quzyretti organdar aralasqanǵa uqsaıdy. Bul týraly biz de osynyń aldynda gazetimizdiń táýlik boıy jańaryp turatyn ınternet-resýrsynda úsh ret aqpar bergenbiz. Mine, osylardyń bárinen belgili bolǵany: Ábilázovtiń qaıdan shyǵyp, qaıda barǵanyn ańdýǵa Izraıldiń Gadot agenttiginiń jeke detektıvteri aıanbaı atsalysqan kórinedi. Olar Muhtardyń áıeli men qorǵaýshylaryna shalǵan qońyraýlarynyń izi boıynsha onyń turǵan mekenin anyqtaýǵa qol jetkizipti. Osynyń qabatynda iz kesýshiler ótken aptanyń basynda olıgarhtyń ýkraınalyq áriptesiniń burynǵy áıeli Elena Tıshenkonyń derevnıaǵa kelip qaıtqan sátin de qalt jibermegen syńaıly. Sonyń aldyndaǵy aptada bul áıel Londonda bolyp, Ábilázovtiń sol qaladaǵy bir isine baılanysty túsinikteme berip qaıtypty. Ol Fransııaǵa oralǵan boıda Muhtarmen habarlasqan. Alaıda, kelinshek sońynda ańdýshy baryn ańǵara qoımasa kerek. Búginde kóbirek aıtylyp júrgen eki derek osylaı syr shertse, úshinshi bir boljam bul mekenjaıdy BTA banktiń ókili bergen degenge saıady. Muny atalmysh banktiń baspasóz qyzmetine silteme jasaǵan «Vremıa» gazetiniń tilshisi málimdedi.
Qalaı degende de, eks-bankırdi aýyzdyqtap, qolǵa túsirýge baǵyttalǵan operasııany bronetehnıka mingen fransýz arnaıy qyzmet organdarynyń jaýyngerleri atqarǵany aıdan anyq. Osyǵan oraı Fransııanyń buqaralyq aqparat quraldary áskerılerdiń bul sharaǵa barynsha muqııat ta tyńǵylyqty daıyndalǵanyn ashyq jazyp jatyr. Bul úshin tipti olar tikushaqpen vıllanyń ústinen aınala ushyp ótip, onyń ornalasqan aýmaǵyn joǵarydan tekserip ótken. Buǵan, ásili, Ábilázovtiń «quthanasyn» qarýly kúzetshilerdiń qorǵap turatyny sebep bolǵan. Biraq, aınalyp kelgende, munyń bári shamadan tys saqtyq pen dúrligý bolyp shyqty, jasanyp kelgen jasaq múshelerine kúzettegi sarbazdardan bir adam da qarsy kelgen joq, barlyǵy aıtylǵan sátinde qarýlaryn tastap, qoralardyń esikterin aıqara ashyp berdi. Al olıgarhtyń qolyna kisen salý kezinde onyń janynda týǵan qaryndasy Gaýhardyń otyrǵany anyqtaldy. Búginde AQSh-ta turyp jatqanyna talaı jyl bolǵan áıelde polısııalardyń sharýasy bolmaǵan. Sondyqtan tártip saqshylary aǵasyn alyp ketken boıda ol óziniń jan-jaqtaǵy týǵan-týystaryna bul jóninde jappaı habar bere bastaıdy.
Osy tusta birqatar aqparat quraldary Muhtar Ábilázovtiń janynda birneshe eldiń pasporttary bolǵanyn da jarysa jazysyp jatty. Máselen, qamaýǵa alynǵan kezinde onyń qaltasynan Ońtústik Afrıka Respýblıkasynyń azamaty ekenin bildiretin qujat shyqqan. Oqyrman qaýym mamyr aıynyń sońynda Italııada qolǵa túsken Ábilázovtiń áıeli Alma Shalabaevadan da dál osy eldiń pasporty tabylǵanyn áli umyta qoımaǵan shyǵar. Budan keıin olıgarhtyń týǵan kúıeý balasy Ilıas Hrapýnov-Beketovtiń taıaýda qalaı ǵana Afrıkanyń tústigindegi memleket prezıdentiniń Shveısarııadaǵy keńesshisi bolyp shyǵa kelgen jaıynyń kómeski deregi aldan kólbeńdep kórine beredi. Tap osy kezde sol kúıeý balanyń týra bir kezderde Máskeýdiń irgesiniń shańyn burqyratqan qaıyn atasy sekildi Alpi taýynyń baýraıyn
