Shildeniń sońynda Fransııada qamaýǵa alynǵan qazaqstandyq eks-bankır Muhtar Ábilázov Ýkraınaǵa nemese Reseıge ekstradısııalanyp qalýy múmkin. Bul týraly keshe ótkizgen baspasóz máslıhatynda Bas prokýratýranyń resmı ókili Nurdáýlet Súıindikov málimdedi.
Shildeniń sońynda Fransııada qamaýǵa alynǵan qazaqstandyq eks-bankır Muhtar Ábilázov Ýkraınaǵa nemese Reseıge ekstradısııalanyp qalýy múmkin. Bul týraly keshe ótkizgen baspasóz máslıhatynda Bas prokýratýranyń resmı ókili Nurdáýlet Súıindikov málimdedi.
«2 tamyz kúni Qazaqstan Respýblıkasynyń Bas prokýratýrasy Ábilázovti ekstradısııalaý týraly ótinish joldady. Sondaı-aq, Ýkraına men Reseı quqyq qorǵaý organdary fransýz bıligine Ábilázovti izdep, ekstradısııalaý týraly nıet bildirgeni aıan. Bul úderister bir-birine qatyssyz júrgizildi jáne basqa memleketterdiń quzyretti organdary aıyp taǵyp otyrǵan tulǵalardy izdep, ustap berýdi suraý nıetine baılanysty sheshimder qabyldaýǵa aralasýǵa nemese yqpal etýge eshkimniń de quqyǵy joq», – dedi Súıindikov.
Bas prokýratýranyń resmı ókili kúdikti tulǵalardy ekstradısııalaý máseleleri olar jasyrynyp júrgen elderdiń ishki zańnamasymen jáne halyqaralyq kelisimdermen retteletinin sóz etti.
«Fransııa, Reseı jáne Ýkraına 1957 jylǵy 13 jeltoqsanda Parıjde jasalǵan Quqyq buzýshylardy ustap berý týraly eýropalyq Konvensııanyń qatysýshylary bolyp tabylady. Qazaqstan Respýblıkasy bul Konvensııaǵa qatyspaıdy», – dedi ol.
Nurdáýlet Súıindikov qazirgi tańda fransýz bıligi halyqaralyq mindettemelerge sáıkes Muhtar Ábilázovti Ýkraınaǵa ekstradısııalaý máselesin qarastyryp jatqanyn jetkizdi. Sonymen qatar, joǵaryda atalǵan Konvensııanyń negizinde ol Reseıge ekstradısııalanýy múmkindigin de joqqa shyǵarmady.
Resmı ókil Bas prokýratýranyń Ábilázovti Qazaqstanǵa qaıtarý maqsatyna bar kúshti jumyldyryp jatqanyna nazar aýdardy. «Buǵan qajet múmkindikterdiń barlyǵyn qoldanamyz. Túpkilikti sheshimdi Fransııa qabyldaıtyn bolady. Ábilázov asa aýyr qylmystardy Qazaqstanda jasaýyna, onyń ústine ol Qazaqstan azamaty bolýyna baılanysty biz onyń Qazaqstanǵa ekstradısııalanýyn talap etýge tolyq quqymyz bar», – dep atap ótti ol.
«BAQ-ta ekstradısııalaý máselesi uzaqqa sozylatyny týraly birneshe ret jazyldy. Eger Ábilázov Qazaqstanǵa ákelinbeıtin bolsa, oǵan baılanysty elimizdiń qandaı sharalar qabyldaıtyny ázirge belgisiz. Biz dál qazir onyń Qazaqstanǵa jetkizilýin qatań túrde talap etýdemiz», – dedi resmı ókil óz sózinde.
Budan ári: «1 tamyzda Eks-an-Provans qalasynyń soty Fransııanyń qylmystyq-prosessýaldyq zańnamasyna sáıkes, Ábilázovti 40 táýlikke deıin qamaýda ustaýǵa sanksııa berdi», – dedi Súıindikov.
Rýslan IGILIK.
