jáne olardyń jaqyndarynyń Shveısarııa bankterindegi esepshottaryna tyıym salyndy
jáne olardyń jaqyndarynyń Shveısarııa bankterindegi esepshottaryna tyıym salyndy
Ádette aıran ishkenderdiń qutylyp, shelek jalaǵandardyń tutylyp qalýlary jıi kezdesýshi edi. Bul joly aıran ishkenderdiń ózderine albasty basqandaı kún týdy. Sebebi, myna jaǵdaıda «shelek jalaǵandar» múlde joq edi. Qolyna aırannyń shelegin ustaýshylardyń ashkóz, sarań, jemqor bolǵandary sondaı, janynda júrgender úshin juǵyn da qaldyra qoımapty.
Keshe elimizdiń baılyǵyn úptep ketken atyshýly alaıaqtar Bergeı Rysqalıev pen Vıktor Hrapýnovtyń jáne olardyń jaqyn-jýyqtarynyń Shveısarııa bankterindegi esepshottaryna tyıym salyndy. Bul týraly Ekonomıkalyq qylmysqa jáne sybaılas jemqorlyqqa qarsy kúres agenttiginiń baspasóz qyzmeti habarlady.
Qarjy polısııasynan habarlanǵandaı, qazirgi tańda Agenttik Qazaqstanda qylmystyq jolmen alynyp, shetelge asyrylǵan kúmándi aktıvterdi anyqtaý men olardy elge keri qaıtaryp alý jolynda belsendi jumystar júrgizip jatyr. Osynyń yńǵaıynda, máselen, Hrapýnovtardyń uıymdasqan qylmystyq tobyna qatysty qylmystyq isti tergeý barysynda Qarjy polısııasy agenttigi Shveısarııa konfederasııasynyń quzyretti organdaryna qylmystyq is boıynsha quqyqtyq kómek kórsetý týraly halyqaralyq tapsyrma jibergen. Quqyqtyq kómek kórsetý týraly tapsyrmada kórsetilgen qujattar men dáıekterdi Shveısarııanyń ýákiletti organdary saralap shyǵyp, nátıjesinde Hrapýnovtarǵa qatysty Shveısarııa konfederasııasynyń aýmaǵynda qylmystyq jolmen tabylǵan kapıtaldy zańdastyrý faktisi boıynsha qylmystyq qýdalaý bastaldy.
Munyń aqyry Shveısarııa quzyretti organdarynyń Hrapýnovtar otbasynyń aktıvterine olardyń zańdylyǵyn anyqtaǵanǵa deıin tyıym salýyna aparyp jetkizdi. Tanysý jáne qylmystyq is fıgýranttarynyń is-áreketine quqyqtyq baǵa berý úshin bankilik, qarjylyq jáne ózge de qujattary alyndy.
Tap osyndaı áreketterdi Shveısarııa konfederasııasynyń federaldyq prokýratýrasy Rysqalıevterge qatysty da bastap ketti. Osynyń negizinde búginde olardyń qylmystyq jolmen alynǵan aqshalaı qarajattaryn zańdastyrý faktisi boıynsha qylmystyq tergeý júrgizilýde. Tergeý aıasynda Rysqalıevter men olardyń jaqyn týystaryna tıesili Shveısarııa bankilerinde jalpy somasy 100 mln. eýrodan asatyn aıtarlyqtaı aqshalaı qarajat salynǵan 3 bankilik esepshot anyqtaldy. Federaldyq prokýratýra atalǵan shottarǵa tyıym saldy.
Qarjy polısııasy agenttigi sońǵy sátterde sondaı-aq óz qyzmetkerleriniń Shveısarııa konfederasııasy aýmaǵynda tergeý amaldaryn júrgizýlerine ruqsat berýdi ótinetin halyqaralyq tapsyrmany da joldady.
Qurysh NURYMBET.
