Aqsý qalasyna qarasty Qurkól aýylynda ánshi, aqyn, halyq kompozıtory, palýan Imanjúsip Qutpanulynyń 150 jyldyǵy atalyp ótti.
Aqsý qalasyna qarasty Qurkól aýylynda ánshi, aqyn, halyq kompozıtory, palýan Imanjúsip Qutpanulynyń 150 jyldyǵy atalyp ótti.
Saltanat qaladaǵy aqyn atyndaǵy sport saraıynyń aldyna qoıylǵan aıtýly tulǵanyń bıýstin ashýmen bastaldy. Músindi oblys ákimi Erlan Aryn men aqynnyń nemeresi fılosofııa ǵylymdarynyń doktory, professor Raýshan Kóshenova ashty. Osy arada oblys ortalyǵyndaǵy Júsipbek Aımaýytov atyndaǵy qazaq mýzykalyq drama teatrynyń ártisteri Imanjúsiptiń ómirinen sahnalyq kórinister usyndy. Jas kezinen-aq jyrǵa, sheshendik sózge qumar bolyp, sal, seriler dástúrin ustap, saıatshylyq quryp, palýan atanǵan Imanjúsip – Jaıaý Musa, Mádı sııaqty ádilet, teńdikti jyrlaǵan kúresker ánshi.
Imanjúsip Qutpanuly 1863 jyly Arqa óńirinde dúnıege kelgen eken. 53 jasyna deıin Saryarqa, keıin Syr óńirinde ómir súrgen. 1930 jyly Tarazdaǵy Moıynqum kóterilisin bastady degen jeleýmen tutqyndalady. 1931 jyly jalǵan jalamen atylǵan.
– Biz Imanjúsipteı tarıhı tulǵalardyń ómirin zerttep, zerdeleý arqyly qazaq tarıhynyń taǵy bir qatparyna kóz júgirte alamyz. Murasy búkil qazaqqa qajet, qundy. Tarıhty bilýimiz kerek, syılaýymyz qajet jáne urpaqqa nasıhattaýǵa tıispiz, – dedi oblys ákimi Erlan Aryn óz sózinde.
Jıynǵa Qazaqstan Jazýshylar odaǵy basqarmasy tóraǵasynyń birinshi orynbasary Ǵalym Jaılybaı, respýblıkalyq «Qazaq ádebıeti» gazetiniń bas redaktory Jumabaı Shashtaıuly, Qyzylorda oblysyndaǵy «Mıras» qorynyń tóraǵasy Muhıt Smaıylov, Qaraǵandy oblysynan kelgen Imanjúsip Qutpanulynyń týysy Qambar Seıitqamalov, Ońtústik Qazaqstan oblysyndaǵy «Qajymuqan» qorynyń dırektory Nurlan Qajymuqanov qatysty. Aqynnyń urpaǵy Raýshan Qoshenovanyń aıtýynsha, jalpy, Qutpanovtardyń áýleti el, ult úshin kúresken jandar. Imanjúsiptiń 20-ǵa jýyq áni bar eken. Muhtar Áýezov 1936 jyly óziniń bir eńbeginde «Ereımentaý» áni týraly aıtqan. Endigi kezekte onyń barlyq ánderin zerttep, taratýymyz kerek. Al, aqyn Qasymhan Begman «Aqyn aǵaǵa syr» degen óleńinde «Saryarqaǵa syımaı bir ótken Imanjúsipteı qaırattym...» dep jyrlaıdy.
О́tken tarıhqa taǵzym etý – urpaq paryzy. Aýyl mańyna kıiz úıler tigildi. Ulttyq sport túrlerinen jarystar ótkizildi. Aýyldaǵy mádenıet úıinde eki kún boıy aıtys ótip, aýyldyqtar rıza bolyp qaldy. Aıtysker aqyn Amanjol Áltaev:
Saryarqa, atameken quba belsiń,
Syrymdy uly alash uǵa bersin,
Osyndaı asyl meken Kerekýde
Imekeńdeı alyptar týa bersin, – dep tilek aıtty.
Farıda BYQAI,
«Egemen Qazaqstan».
Pavlodar oblysy.
