Qazaqstan Áskerı-teńiz kúshteriniń «Qazaqstan» zymyrandyq-artıllerııalyq kemesiniń ekıpajy kemelik-jaýyngerlik oqý-jattyǵý barysynda joǵary baǵa aldy. Ashyq teńizge shyqqan Qazaqstan Qarýly Kúshteri Áskerı-teńiz kúshteriniń áskerı qyzmetshileri ashyq teńizde taktıkalyq ssenarııge sáıkes, kemege shartty túrde áýeden jáne katerden shabýyldy toıtardy. Shartty túrde jappaı zaqymdaý qarýy, teńiz mınalary qoldanylýyna qarsy áreket etti, izdestirý-qutqarý is-sharalaryn júrgizdi. Bul áskerı is-qımyldar «jeke kememen teńiz urysyn júrgizý» jattyǵýynyń sheńberinde jasaldy.
Kapıtan-leıtenant Erkebulan Dárkenbaev basqarǵan «Qazaqstan» zymyrandyq-artıllerııalyq kemesiniń ekıpajy qoıylǵan mindetti nyq senimmen oryndap shyqty. «Teńizshiler kemeni basqarý men kemede bar atys quraldaryn qoldanýdyń jaqsy deńgeıin kórsetti», – dep áskerı-teńiz bazasynyń komandıri birinshi dárejeli kapıtan Sáken Mansurov baǵa berdi.
Áskerı teńizshilerdiń jattyǵýlary Kaspıı teńiziniń aıdynynda jospar boıynsha jalǵasa bermek. QR QK ÁTK kemeleriniń ekıpajdary jaýyngerlik daıyndyq qarqynyn arttyryp, jańa mindetterdi oryndaýǵa ázirlenýde. Qazaqstan Qarýly Kúshteri Áskerı-teńiz kúshteriniń sapynda gıdrografııalyq, raketalyq-artıllerııalyq, mına traldaýshy kemeler bar. Al «Qazaqstan» zymyrandyq-artıllerııalyq kemesi otandyq qorǵanys-ónerkásiptik kesheniniń alǵashqy ónimi. Bıyl sáýir aıynda «Zenıt» zaýytynda taǵy da bir «Oral» atty áskerı keme qurastyrylyp shyqty. Bul kemeniń ekıpajy da ózderiniń mindetterin atqarýǵa kiristi.
«Egemen-aqparat».
