Kendi Altaıda sońǵy úsh-tórt jylda jıyrmaǵa tarta jańa mektep salynyp, paıdalanýǵa berildi. Sonyń biri – Kókpekti aýdanyndaǵy Kókjota orta mektebi. Ashylǵanyna jarty ǵasyrdan asqan bilim ordasynan túlep ushqan shákirtter ózderin qanattandyrǵan altyn uıasyn umytqan emes, qaıyrymdylyq jasap turady.
Kendi Altaıda sońǵy úsh-tórt jylda jıyrmaǵa tarta jańa mektep salynyp, paıdalanýǵa berildi. Sonyń biri – Kókpekti aýdanyndaǵy Kókjota orta mektebi. Ashylǵanyna jarty ǵasyrdan asqan bilim ordasynan túlep ushqan shákirtter ózderin qanattandyrǵan altyn uıasyn umytqan emes, qaıyrymdylyq jasap turady.
Jaqynda Kókjota orta mektebinde el esinde qalatyndaı eleýli oqıǵa boldy. Almatydaǵy Qazaq agrarlyq memlekettik ýnıversıtetiniń kafedra meńgerýshisi, mal dárilerin shyǵaratyn «Antıgen» ǵylymı-óndiristik kásipornynyń prezıdenti, veterınarııa ǵylymdarynyń doktory, professor Nurlan Ahmetsadyqov qanat qaqqan bilim ordasyna kelip, shákirttermen kezdesip, osy mektepte 40 jyl ustaz, dırektor qyzmetin minsiz atqarǵan, jerlesteriniń qurmetine bólengen Nurolla Ahmetsadyqov atyndaǵy synypqa, mektepke oqý quraldaryn, birneshe kompıýter, jıhaz, teledıdar, daıyndyq synybyna arnalǵan qural-jabdyqtar, 1-4 synyp oqýshylaryna elektrondy oqýlyqtardy syıǵa tartty.
Budan bes jyl buryn ataýly synyp ashylǵanda da professor Nurlan Ahmetsadyqov zaıyby Maıamen birge kelip, «Týǵan jerge – taǵzym!» aksııasyna ún qosyp, eki mıllıon teńgeniń qural-jabdyqtaryn syıǵa tartqan bolatyn.
Mektep ustazdarymen ótken kezdesýde «Antıgen» ǵylymı-óndiristik kásipornynyń basshysy ózi basqaratyn ujymnyń malǵa qajet dári-dármek shyǵaratynyn, damyǵan eldermen qarym-qatynasta ekenin, qazirgi tańda shyǵarmashylyq izdeniste bolǵanda ǵana kún talabyna saı dári shyǵarýǵa múmkindik týatyny jaıly aıtyp berdi. Kezdesýde professor osy aýyldyń týmasy, jyr jazýǵa talpynyp júrgen balany óz qarjysyna oqytatynyn aıtyp jerlesterin qýantyp tastady.
Mektep dırektory Gúljanat Kongýlova professor jerlesine ustazdar men shákirtter atynan alǵysyn bildirdi. Shákirtter án men kúıden shashý shashty. Kókjota aýylyndaǵy jańa mekteptegi qýanysh aýyl adamdaryn bir serpiltip tastady.
Ońdasyn ELÝBAI,
«Egemen Qazaqstan».
Shyǵys Qazaqstan oblysy,
Kókpekti aýdany.
