Redaksııaǵa Jambyl oblysynyń Qarataý qalasynda turatyn jýrnalıst Qarjaýbaı Bazardan hat keldi. Onda avtor óziniń 2 jyldan beri jumyssyz júrgenin aıtyp shaǵynady. Biz búgin saıt aıasynda sol hatqa oryn berýdi jón kórip otyrmyz. Shaǵymdaǵy keıbir grammatıkalyq jáne stılıstıkalyq qatelerdi túzetkenimiz bolmasa, onyń mazmunyna tıisken joqpyz.
Endi oblystaǵy tıisti quzyrly oryndar hatta baıandalǵan jaılardyń aq-qarasyn anyqtap, ózderiniń tıisti baǵalaryn berer degen úmittemiz.
Men 1984 jyldan Qarataý qalasynda turamyn. Ken baıytý fabrıkasynyń shahtasynda eńbek ete júrip, QazMÝ-dyń jýrnalıstıka fakýltetine syrttaı túsip, ony 1997 jyly bitirdim. 2000 jylǵy 6 naýryzdan Talas aýdandyq «Talas tynysy» gazetinde tilshi, bólim meńgerýshisi bolyp eńbek etip keldim. 2011 jyldyń 13 shildesinen beri jumyssyzbyn. 2011 jylǵy 12 shilde kúni redaksııada jumys aıaǵynda tóbeles bolyp, gazet redaktorynyń orynbasary ekeýi maǵan jabylǵan.
Erteńine aýdan ákiminiń orynbasary Murat Turysbekovtiń aldyna barǵanymyzda, ol «ekeýińiz de jumystan shyǵasyzdar» dedi. Sonda Dúısen: «Qarjaý óz erkimen aryz jazyp, 1,5 aı demalsyn, sosyn qaıta alamyn» dedi. 1,5 aıdan keıin kelsem, almaımyn dep otyr. Sosyn men aýdan ákimi Aıtqazy Qarabalaevqa aryz jazdym. Al Aıtqazy myrzada ún joq. Osy aralyqta aýdandyq qarjy polısııasyna, aýdandyq prokýratýra, aýdandyq sotqa deıin jumysyma kirgizý jóninde aryzdandym. Bárinen de «Bul isti biz sheshe almaımyz» degen hat keldi. Bir kúni osyny aıtyp hat jazyp, ákimge jiberdim. Al ákimniń ishki saıasat bólimi meni shaqyrypty. «Ne talap etesiz?» dedi aǵaı. Men. «Osy ýaqytqa deıingi aılyǵymdy jáne ákim óz atynan at-shapan aıybyn tólesin» dedim. Sol kúni keshke kólik qaǵyp, aıaǵym syndy.
2009 jyly gazet redaktory orynbasary Sáýlenbaı Ápsadyqtan sol kezdegi ákim Ońlasyn Jıenqulovqa aryz túsken. Sonda ákim ardager qarııalardy salyp jatyp, aryzyn aldyrǵan. Sosyn ony aýdandyq mádenıet jáne tilderdi damytý bólimi bastyǵy etip kóterip jiberdi. Sol kezde ol úıinde otyrǵan áıelin redaksııaǵa eden jýýshy etip kirgizdi. Ol orynda buryn alty balasy bar, sol kezde kúıeýi jumys istemeıtin Kúlpash degen kelinshek istegen, ony jumystan shyǵardy.
Osy aralyqta men aýdanǵa kelgen Parlament Májilisiniń depýtattary B.Ertaev pen Q.Jabaǵıevqa da aıttym, oblystyq tártiptik keńestiń Á.Satybaldınge de aıttym. Ol kisi tez ornyna alyńdar dep tapsyryp ketti. Ertesine ákim apparaty jetekshisine barsam, B.Badaev: «Ákim seni maǵan kirgizbeı-aq, mádenıet bóliminen jumys taýyp berýdi tapsyrdy» dedi. Mádenıet bóliminiń bastyǵy Ǵanı degen inime barsam: «Aǵaı, bir aı kúte turyńyz, demalystaǵylar kelsin» dedi. Aıtqan ýaqytynda kelsem: «Aǵaı, sizdi búkil oblys tanıdy eken, myqty jýrnalıst, baıqa, basyń bálege qalmasyn deıdi, endi ákimniń aldynan bir ótińizshi» dedi.
Sodan beri men áli ákimdi ustaı almaı júrmin...
Qarjaýbaı Bazar,
jýrnalıst.
Qarataý qalasy,
Jambyl oblysy.
