Meıirimdi, raqymdy
Allanyń atymen bastaımyn!
Qadirli otandastar, qurmetti baýyrlar!
Meıirimdi, raqymdy
Allanyń atymen bastaımyn!
Qadirli otandastar, qurmetti baýyrlar!
Álemniń ár túkpirin mekendegen musylman qaýymy Ramazan aıymen qımaı qoshtasýda. Musylman qazaq halqy da qasıetti aıdy qulshylyqpen, taqýalyqpen ótkizip, Jaratqannan elge jaqsylyq tilep, duǵa jasady. Kúnniń aptap ystyǵyna qaramastan, Allanyń meıiriminen úmit etip, oraza ustady. Paıǵambarymyz Muhammed (s.ǵ.s.) oraza tutqan úmbetin Allanyń úlken syıymen súıinshilegen. «Kimde-kim Alla jolynda bir kún oraza ustasa, Alla sol pendeniń júzin tozaqtan júz jylǵa alystatady», – degen hadıs musylmanǵa jiger men úmit syılaıdy. О́ıtkeni, Ramazan aıynda aýyz bekitýdiń saýaby teńdessiz. Ramazan – izgi amaldardyń maýsymy bolǵandyqtan, múbárak aıda Allaǵa unamdy árbir qaıyrymdy istiń saýaby eselenip jazylady. Sebebi, ystyq pen ashtyqqa, Allaǵa jaǵymsyz ister men ǵaıbat sózden saqtanyp, sabyr etken pende ómirdiń kezektesip keletin qıynshylyqtary men synaqtaryna tózimdilik tanytatyny aqıqat.
Barshamyzdy Oraza aıt merekesine aman-esen jetkizgen Alla taǵalaǵa sansyz shúkirler men madaqtar bolsyn. «Aıt» sózi «qarymta» degen maǵynany bildiredi. О́ıtkeni, Jaratýshy Iemiz árbir izgi amal men ıgilikti istiń ıesine qarymtasyn qaıtarady. Paıǵambardyń (s.ǵ.s.) taǵy bir hadısinde jumysshy aı sońynda jalaqy alatyny sekildi, oraza ustaýshy da Allanyń nyǵmetine, syı-sııapatyna bólenetini aıtylǵan.
Musylman qaýymynyń ulyq merekesi – Oraza aıtta júregimiz qýanysh pen shattyqqa bólenedi, janymyz jadyrap, kóńilimiz shat-shadyman kúı keshedi. Barshańyzdy musylmannyń ulyq merekesimen quttyqtaımyn. Oraza aıt múbárak bolsyn!
Aıt kúninde ǵusyl quıynyp, jupar ıis sebinip, jamaǵatpen aıt namazyna qatysýdyń saýaby mol. Týǵan-týystardy, kórshilerdi, dos-jarandy merekemen quttyqtap, dastarqan jaıyp, ulyq meıramnyń sáni men saltanatyn arttyrý – Oraza aıttyń ózine tán jarasymdy hám saýapty amaldarynan. Osy merekede ózara renjisken kisilerdi tatýlastyrsaq, ózgeniń qate-kemshiligin keshire bilsek, ol da – musylmanǵa tán sıpat. О́ıtkeni, Alla taǵala qasıetti Quranda musylmandardy keshirim jolyn ustanýǵa buıyrǵan.
Kúndegi orazasyn qurmamen ashýdy súnnet etken Paıǵambarymyz (s.ǵ.s) aıt namazyna bararda aldymen qurmadan dám tatyp baryp úıinen shyqqandy unatatyn.
Oraza aıtta otbasymyzǵa kóńil bólip, balalarǵa syılyq jasap, aıttyq áperýdiń de mańyzy zor. Balanyń boıyna izgiliktiń dánin sebetin merekeni olar da asyǵa kútip, tálimi men tárbıege toly qasıetti aıdyń máni men mańyzyn sezinetin bolady.
30 kún orazada halqymyz yjdahattylyqpen aýyz bekitti. Meshitterimizde aýyzasharlar men qaıyrymdylyq sharalar uıymdastyryldy. Turmysy tómen otbasylaryna kómek kórsetilip, qamkóńil qarttar men jetim-jesirlerge kóńil bólindi. Kóptegen azamattar jaqsylyqqa úles qosyp, saýaby mol amaldarǵa atsalysty. Barshasyna «Alla razy bolsyn» aıtamyz. Ramazan aıynda elimizdiń ıgiligi úshin jasaǵan árbir qaıyrly amal men qulshylyqty aldaǵy ýaqytta da jalǵastyrýdyń qarymy sheksiz.
Alla taǵala ustaǵan orazalarymyzdy, duǵa-tilekterimizdi, izgi isterimizdi qaıyrymen qabyl etip, eki dúnıede de júzimizdi jaryq etkeı! Memleketimizdiń mereıi árqashan ústem bolǵaı!
Halqymyzdyń birligi men yntymaǵyna eshqashan syzat túspesin! Táýelsizdigimizdiń tuǵyry bıik, egemendigimiz máńgilikke baıandy bolǵaı!
Erjan qajy MALǴAJYULY haziret,
Qazaqstan musylmandary dinı
basqarmasynyń tóraǵasy, Bas múftı.
