Qazaqstannan aǵaly-qaryndasty eki jetkinshekti asyrap alǵan amerıkalyq erli-zaıyptylarǵa balalardy zorlady degen aıyp taǵylyp jatyr. Dúıim jurtty dúr silkindirgen bul qylmystyq is boıynsha qazir Massachýsets shtatyndaǵy Vorchester qalasynyń joǵarǵy soty tyńdaýdy qolǵa aldy.
Qazaqstannan aǵaly-qaryndasty eki jetkinshekti asyrap alǵan amerıkalyq erli-zaıyptylarǵa balalardy zorlady degen aıyp taǵylyp jatyr. Dúıim jurtty dúr silkindirgen bul qylmystyq is boıynsha qazir Massachýsets shtatyndaǵy Vorchester qalasynyń joǵarǵy soty tyńdaýdy qolǵa aldy.
Negizinde bul oqıǵanyń basy 2009 jyldan arna tartady eken. Jergilikti The Milford Daily News gazetiniń jazýynsha, sol joly Ýıtınsvıll atty shaǵyn qalada turatyn 49 jastaǵy Lında jáne 50 jastaǵy Djozef Meıottar birinshi ret qamaýǵa alynady. Olarǵa qylmystyq kodekstiń 26-tarmaǵy boıynsha aıyp taǵylady. Sonyń ishinde qıyn jaǵdaıda balany zorlaý, 14 jasqa tolmaǵan búldirshindi buzylǵan jolǵa salý degen sekildi aıyptaýlar ushyrasqan. Biraq 2010 jyly erli-zaıyptylar aıypty emes degen uıǵarym jasaldy. Alaıda, soǵan qaramastan, sot olardy 25 myń dollar kóleminde kepildik tóleýge májbúr etken. Sonymen birge bul ekeýi GPS-datchıgin taǵyp júrýge tıisti bolǵan.
Arada úsh jyl ótkennen keıin sol oqıǵa boıynsha taǵy da qylmystyq is qozǵalyp otyr. Okrýg prokýrorynyń kómekshisi Sherıl Rıddl sotta qazaqstandyq eki balanyń Meıottar otbasyna 2004 jyly ákelingenin málimdedi. Sol kezde qyzdyń jasy 8-de, uldyń jasy 13-te eken.
«Bul otbasynda sodan bastap naǵyz sumdyq oqıǵalar oryn alǵan, – deıdi Sherıl Rıddl. – Bóten tildi bóten elge tap bolǵan kishkentaı qazaqstandyqtardyń budan sońǵy barlyq erki ózderin asyrap alǵan ata-analardyń qoldarynda bolǵan. Olar bularǵa ne isteımin dese de olar tıtteı de qarsylyq kórsete almas edi. Muny erli-zaıyptylar jaqsy paıdalanǵan».
Prokýrorǵa kómekshi kelinshektiń aıtýynsha, 2007 jyly qyz bala úıdegilerdiń ózderine ne isteıtinderin kórshilerine aıtyp qoıady. Alaıda, balalar bul oqıǵany polıseılerge aıtyp berýden birden bas tartady. Sebebi, asyrap alǵan ókil shesheleri ábden qorqytyp qoıǵan sııaqty.
«Lında naǵyz qýyrshaqty oınatýshy ártistiń rólin tamasha oınap shyqty, jipti qalaı qaraı qozǵasa, balalar solaı qaraı júrdi», – deıdi Sherıl Rıddl osyǵan oraı.
Tyńdaý barysynda jurttyń jaǵasyn ustatqan taǵy bir derek málim boldy. Buzylǵan Lında Meıottyń ózi týǵan úshinshi balanyń bıologııalyq ákesi... qazir jasy 21-ge kelgen óziniń ókil balasy bolyp shyqty. Otbasynyń advokattary bul aqparatty joqqa shyǵarmaıdy. Biraq ony ózderinshe taldap áketedi. Máselen, qorǵaýshy Lorel Sınger jasóspirim bala óziniń ókil sheshesin jynystyq qatynasqa barýǵa ózi kúshtep kóndirgen degendi aıtady. Muny ol Lındanyń qazir shyǵaryp otyrǵan sózderine qaraı aıtatyn bolsa kerek.
«Ol Lında Meıotty tórt jyl boıy zorlap kelgen. Qarsylassa, uryp turǵan. Polıseılerge asyrap alǵan anasy ózine zorlyq kórsetkenine shaǵymdanamyn dep qorqytqan », – deıdi Lorel Sınger. Al advokat Krıstofer LoKonto otaǵasy tipti bul sumdyq oqıǵalardan múldem beıhabar bolǵan dep sendirgisi keledi.
Endi 13 jastaǵy balanyń dál solaı jasaı alatynyna sene qoıý qıyn shyǵar.
Sonymen, Amerıkanyń shettegi bir shaǵyn qalasynda osyndaı bir is boıynsha sot prosesi júrip jatyr. Onda Qazaqstanda týǵan eki balanyń bolashaq taǵdyry da sheshilmek.
Buǵan qosatynymyz, aǵaly-qaryndasty eki jastyń Petropavl qalasynyń týmalary ekenderi endi belgili bolyp otyr.
Murat AITQOJA.
