Oqyrman nazaryna usynylǵan tarıhı mańyzy zor jýrnaldar men kitap mazmuny táýelsiz Qazaqstannyń qalyptasýymen qatar kelgen Elbasynyń saıası ómiri men róline arnalǵan. Elbasy kitaphanasynyń dırektory, professor Ámirhan Rahymjanovtyń moderatorlyǵymen ótken sharaǵa Tuńǵysh Prezıdent – Elbasy N.Á.Nazarbaevtyń zamandastary men depýtattar, kitaphanashylar men elorda jastary qatysty.
– Tarıhı mazmundyq turǵydan qundy bolyp tabylatyn bul kitaptardyń barlyǵy da bir arnaǵa toǵysady. Bul kitaptar Qazaqstan Respýblıkasynyń Tuńǵysh Prezıdenti – Elbasy N.Á.Nazarbaevtyń memlekettiń qalyptasýy men nyǵaıýy, kópultty Qazaqstan halqynyń yntymaq-birligi, qoǵamdaǵy turaqtylyq pen eldiń rýhanı gúldenýi, dúnıe júziniń aldyńǵy qatarly derjavalarymen áriptestik pen yntymaqtastyq ornatý jáne beıbit ǵalam jolyndaǵy kópqyrly saıası qyzmetiniń asa baı tájirıbesin kórsetýge arnalǵan. Bul basylymdar Tuńǵysh Prezıdenttiń seriktesi, Elbasy Keńsesiniń basshysy, saıası ǵylymdar doktory, professor Mahmut Bazarqululy Qasymbekovtiń ıdeıasymen jáne jetekshiligimen «Qazaqstan Respýblıkasynyń Tuńǵysh Prezıdenti – Elbasy N.Á.Nazarbaev: memlekettik basqarý strategııasy jáne kóshbasshy fenomeni» ǵylymı baǵdarlamasy aıasynda daıyndaldy, – dep atap ótti Ámirhan Muratbekuly.
Sóz kezegin alǵan Parlament Májilisiniń depýtaty Qýanysh Sultanov «Nursultan Nazarbaev: kóshbasshylyq strategııasy» atty eki bólimnen turatyn kitap týraly óz oıyn ortaǵa saldy. «Jastardyń aldyńǵy urpaqtyń kórgen qıyndyǵyn basynan ótkizýi mindetti emes. Keńes Odaǵy quramynda Máskeýge baǵynyshty bolǵan kezeńdi endigi urpaq kórmesin. Jastar tek bostandyqta ómir súrsin. Jastarymyzdyń memleketshil bolyp ósýi, elimizdi qorǵaý men saqtaýdyń, ulttyq qaýipsizdiktiń maǵynasyn túsinýi – memlekettiń tulǵasyna baılanysty. Búgin oqyrmandaryna jol tartqaly otyrǵan kitaptardaǵy derekter táýelsizdiktiń qasıettiligin kórsetip, onyń baǵasy men qadirin bildiredi. Bul jınaqtarǵa engen barlyq shyǵarmada Elbasynyń estelikteri men sózderi memleketshildik qasıetti joǵary kóteredi. Sondyqtan búgin bizdiń rýhanı ómirimizde úlken jańalyq boldy dep esepteımin. Osyndaı shyǵarmalardy keńinen nasıhattaý – barshamyzdyń mindetimiz», dedi Májilis depýtaty.
Tusaýy kesilgen jınaqtardyń biri – «N.Á.Nazarbaevtyń eýrazııalyq bastamalary: tarıhy, qazirgi jaǵdaıy jáne bolashaǵy» – eýrazııalyq ıntegrasııa ıdeıasynyń 25 jyldyǵyna jáne Eýrazııalyq Ekonomıkalyq Odaq týraly shartqa qol qoıylýynyń 5 jyldyǵyna arnalǵan. Máskeý memlekettik ýnıversıtetiniń qazaqstandyq fılıalynyń dırektory, ekonomıka ǵylymdarynyń doktory Aleksandr Sıdorovıch Eýrazııalyq odaq sheńberinde barlyq elderdiń bekitilgen mindettemesiniń qundylyǵy kelisilgen saıasatta ekenin aıtty.
«Eýrazııalyq qaǵıdattardy jarııalaý, bul – táýelsiz memleket Qazaqstannyń jańa álemge ený konsepsııasy. N.Á.Nazarbaev konfrontasııa emes, ózara túsinistiktiń jáne óz eliniń ulttyq qundylyqtaryna degen qurmeti men syılastyqtyń jańa qaǵıdalary negizinde ashyqtyq jolyn tańdady. N.Á.Nazarbaevtyń asa kórnekti aqylymen qurylǵan Eýrazııalyq ıdeıa maǵynasy men múmkindigi jaǵynan osyndaı tásilmen úndesedi», dep atap ótti A.Sıdorovıch.
«Biz biletin Elbasy» – táýelsizdiktiń alǵashqy jyldarynda egemen memleketti damytýdyń jańa joly men úlgisin izdegen tusta Tuńǵysh Prezıdenttiń janynan tabylǵan, qol jetkizgen ár jetistigine birge qýanyp, qoldaý kórsetken Elbasynyń zamandastarynyń estelikter jınaǵy. 1960 jyldary Temirtaý qalasynda qyzmet etken Elbasynyń eńbek joly týraly estelikterimen Qazaqstannyń alǵashqy Syrtqy ister mınıstri, akademık Tóleýtaı Súleımenov oı bólisti:
«Búkilodaqtyq «Pravda» gazetinde eńbek jolyn metallýrgııalyq kombınatta gornovoıdan bastaǵan, partkom hatshysy bolǵan Nursultan Nazarbaevtyń synap aıtylǵan otty maqalasy jaryq kórdi. Ol gazet betinen kombınattyń qyzmeti, metallýrgterdiń, Temirtaý qalasy turǵyndarynyń qajettilikter týraly aıtty. Keńes kezeńinde bulaı jasaý óte qıyn edi, osyndaı qadam jasaý úshin asa batyl bolý kerek edi».
Sonymen qatar jańa basylymdar qatarynda «Iаdrolyq qarýsyz álemge betburys: Elbasy bastamalary» – Qazaqstannyń Tuńǵysh Prezıdentiniń bitimgerlik bastamalaryna jáne onyń barsha adamzattyń múddesi úshin ıadrolyq qarýdan azat álemdi qurý jónindegi saıasatyna arnalǵan jınaq jáne «Máńgilik El» ıdeıasy: keshe, búgin, erteń» atty ujymdyq monografııa bar.
