Almaty qalasy ákiminiń tapsyrmasy boıynsha jumys toby qurylyp, izdestirý amaldaryna qalanyń Tótenshe jaǵdaılar qyzmeti de kiristi. Bul aqparatty Lider eriktiler qozǵalysy da óziniń Instagram paraqshasynda jarııa etip, balalar aman-esen tabylsa degen úmitpen izdestirý sharalaryna qosylǵan bolatyn.
Almaty qalasy TJD baspasóz qyzmetiniń málimeti boıynsha, 13 aqpan kúni tańǵy saǵat 04.31-de 112 pýltine Alataý aýdany polısııa basqarmasynyń jedel kezekshisinen Terekti shaǵyn aýdanynyń jasandy kollektorynyń janynda mektep rıýkzaktary tabylǵany týraly habarlama kelip túsken. Oqıǵa ornyna QR IIM TJ komıteti respýblıkalyq jedel-qutqarý jasaǵynyń súńgýirleri jedel jumyldyrylǵan. Súńgýirler on úsh jasar Denıs Melnıkov, Sabyr Dúıseǵalıev jáne Vadım Sızovtiń denesin sýdan alyp shyqty. Eki kúnge jýyqtaǵan jedel izdestirý jumystarynyń aıaǵy qaıǵyly jaıtpen aıaqtalǵany barshaǵa aspannan jaı túskendeı áser etkeni anyq.
Búginde QR IIM málimetteri boıynsha elimizde otyzdan astam bala joǵalǵandar tiziminde tursa, ótken jyly 140-tan astam bala izdestirilip, otbasyna oralǵan. Mamandar balalardyń úıden ketý sebepterin kóp jaǵdaıda áleýmettik az qamtylǵan otbasylardaǵy jaǵdaılarmen baılanystyrady. Alaıda turmys jaǵdaıy táýir otbasylardyń ózinde de balalardyń tómen baǵa alǵany, mektepte tártip buzǵany úshin ata-anasynyń jazalaýynan qorqyp, úıden ketip qalatyndary týraly derekter az emes. Mundaıda keıbir jaǵdaılardyń aıaǵy sýısıdpen aıaqtalyp jatady.
Bala taǵdyryna qatysty jaıttardyń basy birdi-ekili sebeptermen ashylmaıtyny anyq. Onyń astarynda áleýmettik hám qoǵamdyq máseleler jatyr.
ALMATY
