«Vedomstvoaralyq komıssııanyń kelisimimen Memlekettik bas sanıtarlyq dárigerdiń qaýlysyna sáıkes koronavırýstyq ınfeksııa (Sıngapýr, Japonııa, Taıland, Ońtústik Koreıa, Gonkong SAR jáne QHR Makao SAR, Taıvan (QHR), taraǵan elderden Qazaqstanǵa kelgen azamattar shekaradan ótken kúnnen bastap 24 kún medısınalyq baqylaýda bolady. Mamandar 14 kún boıy úı-úıdi aralap tekseredi jáne 10 kún qashyqtan monıtorıng júrgizedi. Jalpy Qazaqstanǵa kelgen 488 myńnan astam adam qaraldy. Respıratorlyq aýrý belgileri jáne dene qyzýy joǵary 175 adam aýrýhanaǵa jatqyzyldy. Onyń ishinde 15 naýqas stasıonarlyq emdeýde qalady. Emdelýshilerdiń jaǵdaıy qanaǵattanarlyq, koronavırýstyq ınfeksııa aýrýy rastalmaǵan. Resmı jáne úkimettik delegasııa ókilderiniń, sondaı-aq qyzmettik jáne dıplomattyq pasporttar ıeleriniń, avıakompanııa ushqyshtarynyń jáne qolaısyz aýmaqtardan keletin ekıpaj músheleriniń densaýlyǵyna da 24 kún qashyqtan monıtorıng júrgiziledi. Medısınalyq uıymdar 6 qańtardan bastap Qytaıdan kelgen azamattardyń densaýlyǵyna turǵylyqty jeri boıynsha monıtorıng júrgizýde. Búginge deıin 24 myńnan astam adam qatań baqylaýda boldy, qazir 23 647 adam monıtorıngten shyǵaryldy, al sońǵy 14 kúnde kelgen 789 adam, aýrýhanaǵa jatqyzylǵan. Iаǵnı medısınalyq baqylaýda. Olar 14 kúndik stasıonarlyq karantınde bolǵannan keıin shyǵarylady. Densaýlyq saqtaý mınıstrligi qaýipti, kúmándi aımaqtardan kelgen qazaqstandyqtarǵa ózge adamdarmen baılanysty úzip, úı jaǵdaıynda karantındi jalǵastyrýdy usynady», dedi ol.
Sonymen qatar E.Birtanov Zaısandaǵy jaǵdaıǵa qatysty pikir bildirdi.
«Elimizge kelip jatqan tranzıttik taýarlar da bar. Sol kólikter arqyly shekarany kesip ótken júrgizýshiler Shyǵys Qazaqstandaǵy Baqty jáne Maıqapshaǵaı beketi arqyly keledi. Odan bólek temir jol arqyly ótetin pýnktter bar. Biz kúndelikti monıtorıng jasaımyz. Sanıtarlyq dáriger sol jerde turady. Teplovızorlar bizde bar. Rezervten alynǵan aqsha boıynsha qosymsha teplovızor alýǵa qazir tyrysyp jatyrmyz», dedi vedomstvo basshysy.
Mınıstrdiń aıtýyna qaraǵanda, shekaradan ótken barlyq júrgizýshige baqylaý júrgizý kerek.
«Mysaly bizdiń aqparat boıynsha Qytaıda bıznespen, saýdamen aınalysatyn birneshe Qazaqstan azamaty bar. Olar elge qaıtýy qajet. Biz olarǵa múmkindik berýimiz kerek. Árıne táýekelder bar. Olar qaýipsizdikke baılanysty kelgennen keıin baqylaýǵa alynýy tıis», dedi mınıstr.
E.Birtanov Zaısanda «Qytaı azamattary kelip jatyr» degen jalǵan aqparat tarap ketkenin atap ótti.
«Bul árıne durys emes. Máselen, ótken táýlik boıynsha Maıqapshaǵaıdan eshkim ótken joq. Kúndelikti kóp bolsa, Shyǵys Qazaqstan boıynsha 10-15 adam ótedi. Olardyń bári – bizdiń azamattar. Almaty oblysy boıynsha 20-30 adam ótedi. Álbette olar elge kelgennen keıin ári qaraı ınfeksııany taratý qaýpin boldyrmaý úshin aldyn alýymyz qajet. Soǵan baılanysty sol jerde arnaıy karantındik stansa ashý kerek. Sondaı buıryǵymyz bolǵan. Ony azamattar sol aýyldyń ambýlatorııasyna jatqyzady dep túsingen. Sheshim boıynsha bizdiń arnaıy stasıonar – Zaısan aýdanynyń ortalyq aýrýhanasyndaǵy arnaıy bólek ınfeksııalyq aýrýǵa arnalǵan korpýsqa ornalasady», – dedi ol. Mınıstr sonymen qatar Shyǵys Qazaqstanda ınvestısııalyq jobalar boıynsha jumys istep jatqan Qytaı azamattary baryn jasyrmady.
«Qupııa joq. Olardyń arasynda jaqynda Qytaıdan kelgen azamattar da bar. Olar bizdiń baqylaýymyzda. Tirkelgen aýrý adamdar joq. Olardyń densaýlyǵy durys bolsa ári qaraı jumys isteýge múmkindik berýimiz kerek. Sebebi olardyń kelisimsharttar boıynsha óz jaýapkershilikteri bar», dedi E.Birtanov.
