Almatyda volonterler forýmy ótti

Qazaqstan • 24 Aqpan, 2020

Almatyda volonterler forýmy ótti

64 ret kórsetildi

Memleket basshysy Qasym-Jomart Toqaev «Igi ispen aınalysý, adamdarǵa jaqsylyq jasaý – halqymyzdyń kóne zamannan kele jatqan dástúri. Biz osy dástúrdi saqtap qalýymyz kerek. Sebebi bireýge qol ushyn sozyp, qoldaý kórsetý – qanymyzǵa sińgen qasıet. «Jumyla kótergen júk jeńil». Volonterlik qyzmettiń basty maqsaty da – birge jumylyp, halyqqa qyzmet etý» dep eriktiler jyly retinde aıdar taǵylǵan bıylǵy jyl izgilikti ister saltanat quryp, qaıyrymdylyq qasıetterdiń keńge qanat jaıatyn aıtýly sáti ekenin aıshyqtap kórsetti.

Arman OKTIаBR

Qoǵamdy adamgershilikke úndep, jastardy qaıyrymdy iske tárbıeleý maqsatynda qurylǵan «Izgilik elshisi» jobasy ashylǵanyna kóp ýaqyt bola qoımasa da kóptegen ıgi bastamalarǵa muryndyq bolyp keledi. Elimizdiń jetekshi ýnıversıtetteri jappaı qoldaǵan joba Almatyda volonter jastardyń forýmyn ótkizdi. Basqosýda respýblıkanyń barlyq aımaqtarynan kelgen eriktiler óz pikirlerin ortaǵa salyp, Prezıdent aıqyndap bergen jeti baǵyt boıynsha aǵymdaǵy jyly atqarylatyn jumystar jóninde usynys-tilekterin jetkizdi.

Tuńǵysh Prezıdent - Elbasy Qorynyń atqarýshy dırektorynyń orynbasary Igor Rogov, Almaty qalasy ákiminiń orynbasary Erjan Babaqumarov, belgili kınorejısser Ermek Tursynov bastaǵan qonaqtar izgishýaq eńbekteri úshin jastarǵa rızashylyqtaryn bildirip, aldaǵy jumystaryna sáttilik tiledi.

Elimizde eriktiler qozǵalysynyń otyz jylǵa jýyq tarıhy bar. Búginde quramy jastardan turatyn «Eriktiler lıgasy» jumys isteıdi. Kóptegen qoǵamdyq uıymdardyń osy baǵyttaǵy sharalary nátıjeli istermen aıshyqtalýda. «Nur-Otan» partııasynyń da qabyldaý bólmeleri azamattardyń usynys-pikirlerin damylsyz qabyldap keledi. Forýmǵa qatysýshylar bul iste naqty bir júıe kerektigin aıtady. Ár bastaǵan jumystyń arnaıy tujyrymdamasy jasalýy shart. Áleýmettik kómek kórsetýdiń astarynda kózge kórinbeıtin, eriktiler ǵana betpe-bet keletin jaǵdaılar kezdesedi. «Izgilik elshisi» volonterler qozǵalysynyń jetekshisi Aınur Sábıtova eriktilerdi únemi yntalandyryp otyrýdyń mańyzy zor ekenin aıtyp, ataýly jylda barsha jastardy ıgi isterdi birlese atqarýǵa shaqyrdy.

«Volonterlik – árbir azamattyń mindeti. Kópshilik volonterlikti tegin qyzmet kórsetý nemese bireýge járdemdesý dep biledi. Shynyna kelsek, ár azamat volonter bolýy kerek. Sebebi aınalamyzda kómekke muqtaj adamdar kóp. Áńgime tek materıaldyq kómekke tirelmeıdi, jaı ǵana jyly sóz aıtyp muńaıǵanǵa rýhanı járdem jasaýdyń ózi naǵyz volonterlik. Ári úlken saýapty is. Ár azamat turyp jatqan jeriniń tazalyǵyn saqtap, qoǵamnyń birligin nyǵaıtýǵa sózimen de isimen úles qosýy kerek. Máselen jerdegi qoqysty kótergennen azamattardyń arlanbaǵany durys. Saıyp kelgende bul qoǵamnyń izgilenýine qosylǵan úles. Sondyqtan volonterler dep jaýapkershilik pen mindetti shektemegen jón. Bul barlyǵymyz jumyla atqaratyn sharýa», deıdi Aınur Sábıtova.

Volonterlik – óz erkińmen, shynaıy júrek qalaýymen atqarylatyn jumys. Bul –ımandylyq pen parasattylyqtyń aıqyn kórinisi. Búginde álem boıynsha júz mıllıonnan astam adam osynaý ıgi ispen aınalysady. Elimizde 600-ge jýyq volonterlik uıym iri qalalar men aýyldarda belsendi jumys atqarýda.

ALMATY

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz