Elordadan Shý qalasyna arnaıy at basyn buryp «Erke sylqymnyń» avtory Ábdimomyn Jeldibaıulymen áńgimeleskenimizde, kúıshi osy kúıin tuńǵysh tyńdaǵan Táńirden talantty týǵan Tilendiniń uly Nurǵısa atamyzdyń: «Men myqty dırıjer, dáýlesker dombyrashy shyǵarmyn. Biraq naǵyz kúıshi – men emes, sensiń», dep baǵa bergenin aıtyp edi.
«Erke sylqymdy» bala kezden boıǵa sińirip óstik, sebebi ákemiz jıi tartady. Solaı bolyp tursa da kerim kúıdi tolqı tyńdaǵan ár júrektiń túpkirindegi qylyn shertetin qupııasynyń nede ekenin álige deıin tolyq asha almaı kele jatqandaımyz.
Kúıdiń kirispesin dombyramen qosyla yńyldap aıtyp kórińizshi, avtor áńgimesin: «Bir kezderi bárinen beıqam júrgen bozbala edim», dep bastaıtyndaı. О́zińiz oılańyz, 20 jyldan soń sol sezimdi sátin sýrettese, «edim» dep ótkenniń ólshemimen sóz bastaýy zańdylyq. Qalaı bolǵanda da bozbalanyń balańdyǵy ǵana emes, kúıdiń odan ári ekpindeı túsken tusynda aıdaı arýdyń jigit júregine shoq salǵany bappen baıandalatyndaı. Biraq dombyranyń saǵasyna birden barmaı, áýelgi áýenge qaıta kelýi barlyq bozbala men boıjetkende bolatyn «sezimdi moıyndamaý» sezimi men aqylynyń únsiz aıtysyn, arpalysyn ańǵartady-aq. Saǵasyndaǵy «sóz» aqylǵa da, tipti júrekke de baǵynbaıtyn, býyrqanǵan teńizdiń tolqynyndaı týlaǵan kezińdi kóz aldyńa keltiretindeı kórinedi. Mundaı kúı mahabbattyń dámin tatqan barlyq adamnyń basynan ótedi. Áýeni kóńilde, tereńge boılaı alatyndar túsinetin kúıdiń aıtary jadyńda tez jattalady. Al saǵasynan oınaqshyǵan tátti áýezben joǵaryǵa kóterip áketýi, jaı emes, árbir dybysty shertip shyǵarýy – kórikti qyzdyń kóńildi qytyqtaıtyn qylyǵy ispetti. «Qyz qylyǵymen kórikti», degen alaıda júreginde túgi bar boıdaq jigittiń sulýǵa súısinýi de – súıkimdi. Al ol qalaǵa óner qýyp kelgen aýyldyń ańǵal balasy, konservatorııanyń qabyrǵasynda júrip, týǵan jerindegi ǵashyǵyn ańsap júrgen bozbala bolsa she? Tipti tartymdy. Dese de talaıdyń armany bolǵan brıtandyq aktrısa Odrı Hepbern aıtqandaı, «Sezim syılaý – sony sezinýden qundyraq». Mine, sondyqtan da sezim syılaǵan sulýǵa súısinbeý, tamsanbaý múmkin emes. Sol sekildi jigittiń kóz aldynda arýdyń myń qubylyp, árbir qylyǵy qııalynan ketpeıtin, ózine jarasyp turatyn erekshe erkeligi osy bir qos ishektiń qońyr únine úılesimmen túsken.
Osydan soń qaıtalap aıtqyń kele beretin, qosyla ketkiń keletin ádemi ánniń keremet qaıyrmasyndaı, bastapqy notalarǵa oralady. Bul Májnúnniń Láılini ańsaǵanyndaı áser qaldyrady ári júrektiń aqyldy jeńgenin jetkizetindeı. Biraq sol bastapqy áýezden áýelgideı emes, tezirek tómengi pernelerge túsýi qyzdy qııalynda ǵana qushyp júrgen jigittiń shuǵyl sheshimge kelgenin kórsetetin sııaqty. Iаkı bar batyldyǵyn jıyp, ishtegisin syrtqa shyǵarýǵa bel býǵan bozbalany boıjetkenniń betin qaıtarǵandaǵy beınesin baıqaýǵa bolatyndaı. Tómengi pernelerge túsken saıyn dybys qosyp, kúsheıtýin ǵashyǵynan beti qaıtqan bozbalanyń tula boıyndaǵy alaýlaǵan jalynyn, bulqynǵan júrekti, janaryndaǵy sóılep turǵan móldir muńdy kórý úshin kókirek-kóz kerek-aý. Ekinshi ret tómengi dybystan pernelerdi almastyra otyryp joǵary órleýi – sózsiz nazdanýdyń páktigine kórki kelisken qyzǵa jarasyp, tipti ony odan ári ajarlandyra túsetinine tamsana bilý. Ústińgi pernedegi notaǵa burynǵysynan bólekteý toqtaýy – ári erke, ári sylqym sulýdyń syzylýy, soǵan súısinýi sekildi. Kúıdiń júrek qylyn shertip ótetin tátti tusy da osy. Bárin ónermen órip, syrly boıaýmen árleı kelip, aıaǵynda qoltańbasyn qaldyrý úshin sýretshiniń súıkeı salsa da, kartınaǵa kórik kirgize ketetin detali sııaqty salmaqty sazben, ketken kúnniń kórinisimen bastaǵan bastapqy qalpynda támamdaý bar. Kúıshi kúıdi kósile aıaqtaýymen máńgilik mahabbatyndaı ólmeıtin shyǵarmany ómirge ákelýine sebepker bolǵan keıipkerine alǵys aıtatynyn ańǵartatyn sekildi.
Sebebi Ábdimomyn atamyzdyń óz aýzynan estigenimizdeı, kúıdiń keıipkeri – ómirde bar adam, qazir ajary taımaǵan ardaqty áje. Sońǵy ret kezdeskende: «Saǵan degen mahabbatymdy báribir eshkim óshire almaıdy», degen eken. Sodan osyndaı ińkár sezim, tátti saǵynysh syılaıtyn qazaq qyzdaryna kúıden eskertkish quıǵysy kelipti. Onysy oryndaldy da. Al dál osy «Erke sylqymǵa» 2012 jyly sol kezdegi Shý aýdanynyń ákimi, qazirgi májilismen Qojahan Jabaǵıevtiń bastamasymen eskertkish ornatyldy. Kúıge eskertkish qoıý degen buryn-sońdy tarıhymyzda bolǵan joq.
Álbette bul – bizdiń tyńdarmandyq túsinigimizben túıgenimiz, sýbektıvti sózimiz ǵana. Bir romandy 1000 oqyrmannyń 1000 túrli qabyldaıtyny sekildi, kúıge qulaq qoıǵan jannyń qııaly men oıyn tar sheńberge tyǵyp qoıýǵa kelmeıdi. Bir oryndaýshy osy kúıdi tartqanda 2-3 jasar baldyrǵannyń burtıǵany, qarasań kóz toımaıtyn tátti tili, aıtqanyna kónbeı qoıǵany úshin taban asty erkelep jylaı salatyny, sonan soń óbektegenge ernin shúrtıtip jubana ketetini elesteıtinin aıtyp edi. Kelesi bir tyńdaýshy múlde basqa sezimdi bastan keshýi múmkin. Sebebi ár adamnyń óz qalaýyn kórip, sezinýi úshin «Erke sylqymnyń» áýenin tabýǵa 20 jylyn jumsaǵanynda jatqan shyǵar. Avtordyń: «Bul kúı – barsha qazaq qyzdaryndaǵy qaıtalanbas bolmystyń, obrazdardyń jıyntyǵy», deýi sodan.
Maqalany jazý maqsatynda atasynyń shyǵarmashylyǵynan magıstrlik dıssertasııa qorǵaǵan Merýert Jeldibaevamen júzdestik. Merýerttiń áńgimeleýine qaraǵanda, atasyna bul týyndyny ómirge ákelý ońaı bolmaǵan. Bir áýen únemi qulaǵyna keledi, tipti túsine de kiredi. Túnde turyp, notaǵa túsirip ala qoıaıyn dese, qashyp ketedi. Nemeresi kúıdiń kóp oıdan, tereń tolǵanystan týyp, qaǵazǵa bólim-bólim bolyp túskenin aıtady. О́ıtkeni munda jastyqtyń jalyny ǵana emes, 20 jyl boıy jıǵan bilimi men orda buzar jastaǵy kompozıtordyń ómir tájirıbesi de kórinedi. «Erke sylqymnyń» ereksheligi – bir kúıdiń birde shertip, birde tógip tartylatynynda. Al ómirsheń bolyp kele jatqanyn jeke oryndaýǵa da, ansamblda tartýǵa nemese orkestrge salýǵa da qolaılylyǵymen baılanystyrýǵa bolady. О́nertanýshy ári dombyrashy Merýert taǵy bir sózinde:
– Tańerteń atam tartqan temekiniń ıisimen oıanatynbyz. Bir qolynda shylym, bir qolynda uqypty ushtalǵan qaryndash bolady. Esiktiń aldynda turatyn sákidegi dóńgelek ústel basynda bir jaǵyna gazet pen «Juldyz» jýrnalyn, bir jaǵyna nota paraqtaryn shashyp, oılanyp otyrady. Bul – atamnyń shabytty shaǵy. Ol kisi shaı qoıýǵa kúnmen talasyp turǵan kelinine (meniń anama): «Sáýle, anaý Sholpan juldyzyna qarashy. Ne degen ǵajap qubylys!», dep balasha tamsanady eken. «Menińshe, atamnyń shabyt shaqyratyn mýzasy – sol Sholpan juldyz sekildi», – dedi. Bálkim birde býyrqanyp tolqysa, birde syńǵyrlap kúlip arbaıtyn, birde botasyn bále-jáleden qorǵaý úshin bárine baratyn adýyndy arýanaǵa aınalsa, birde shóberesin ıiskep emirenetin meıirimdi ájeniń keıpindeı, myń boıaýly áıel áleminiń tabıǵatyn bir shyǵarmaǵa syıǵyzǵan «Erke sylqymyn» naq sondaı Sholpan juldyzǵa tamsanyp turyp týdyrǵan shyǵar-aý...
