«Júrgen aıaqqa jórgem iligedi» degendeı, júrip-turysy kóp jýrnalıstik jumystyń kórmesti kórip, bilmesti bilip, tipti, aıtpasty aıtyp qoıatyn asaýlyǵy bar. Bul bireýge unar, bireýge unamas, biraq bizdiń maqsat – basqany muqatý emes, jaqsylyqqa jarshy, jetpeske janashyr bolý, kemshilik túzelse eken degen nıet. Qalamen qanattas qonystanǵan Munaıly aýdanynda mektep jetispeýshiligi saldarynan 7000-nan astam oqýshynyń avtobýstarǵa úıme-júıme tıelip Aqtaýǵa tasymaldanatyny, ondaǵy oryn alatyn keleńsizdikter, aýdandaǵy mektepter ahýaly týraly «Avtobýsta ótip jatqan oqýshylyq ǵumyr» taqyrybynda jazǵan maqala «Egemen Qazaqstan» gazetiniń bıylǵy naýryzdyń 6-syndaǵy sanynda jaryq kórgen bolatyn.
«Júrgen aıaqqa jórgem iligedi» degendeı, júrip-turysy kóp jýrnalıstik jumystyń kórmesti kórip, bilmesti bilip, tipti, aıtpasty aıtyp qoıatyn asaýlyǵy bar. Bul bireýge unar, bireýge unamas, biraq bizdiń maqsat – basqany muqatý emes, jaqsylyqqa jarshy, jetpeske janashyr bolý, kemshilik túzelse eken degen nıet. Qalamen qanattas qonystanǵan Munaıly aýdanynda mektep jetispeýshiligi saldarynan 7000-nan astam oqýshynyń avtobýstarǵa úıme-júıme tıelip Aqtaýǵa tasymaldanatyny, ondaǵy oryn alatyn keleńsizdikter, aýdandaǵy mektepter ahýaly týraly «Avtobýsta ótip jatqan oqýshylyq ǵumyr» taqyrybynda jazǵan maqala «Egemen Qazaqstan» gazetiniń bıylǵy naýryzdyń 6-syndaǵy sanynda jaryq kórgen bolatyn.
Endi Munaıly aýdanyndaǵy mektepke qatysty muń biraz seıiledi deýge bolady. 2011-2012 jyldary tek jańa bir mektepke ǵana qol jetkizgen aýdanda bıyl tórt mektep esik ashqaly tur. Onyń úsheýi jańadan ashylsa, bireýi eski mektep ǵımaratyn syıymdylyǵy jaǵynan edáýir úlkendikke ıe jańamen aýystyrý arqyly júzege aspaq.
Jer qoınaýyn paıdalanýshylar esebinen Mańǵystaý-4 turǵyn úı massıvinde 1200 oryndyq, respýblıkalyq jáne jergilikti bıýdjet qarjysyna Mańǵystaý-5 massıvi men Baıandy, Basqudyq selolarynda árqaısysy 960 oryndyq mektepter bıylǵy oqý jylynan bastap paıdalanýǵa berilmek. Taǵy bir jańalyq, tórt mekteptiń ashylýy aýdandaǵy úsh aýysymmen oqytý úrdisin joıatyndyǵy. Al, tasymal túbegeıli toqtamaǵanmen, jartylaı eńseriletindigi qýantady.
– Mańǵystaý-3,4,5 turǵyn úı massıvterinen aýdannyń ózge mektepterine, sondaı-aq Basqudyqtan Aqtaý qalasynyń mektepterine oqýshy tasymaldap oqytý toqtaıdy. Jańa oqý jylynda tek aýdan ishinde jáne oblys ortalyǵyna 3000-ǵa tarta bala qatynap oqıtyn bolady. Aldymyzda josparda turǵan ózge de mektep qurylystary bar, deıdi Munaıly aýdandyq bilim bóliminiń sektor meńgerýshisi G.Muradalıeva.
Josparda turǵan mekteptiń biri jyl sońynda Batyr selosynan ashylady. Búginde 100-ge tarta balasy Aqtaý mektepterine tasylyp júrgen aýylda 960 oryndyq mektep qurylysy nobaılap qalǵan. Endi jyl sońynan bastap batyrlyq osy 100 bala mektepten ketken eseni qaıtarǵandaı bop, qashan aýylǵa jańa qonystanýshylar kóship kep, bala sany tolyqqansha 960 oryndyq mektepti emin-erkin jaılamaq. Al bala sany kóp, biraq mektebi tarshylyq etip turǵan Atamekende 2015 jyly, 960 balaǵa laıyqtap bıyl ashylatyn mektepte 2300 bala selbesip oqýǵa májbúr Basqudyqta 2016-2017 jyldary 640 bala úshin mektep salynady. Demek, Basqudyqtaǵy qalǵan myńǵa jýyq balanyń tasymaldan qutylý taǵdyryn ázirge sol jyldardyń arǵy jaǵynan izdeý qajet.
Osylaısha, bul oqý jyly Munaıly aýdanynyń turǵyndary úshin «aspannan mektep jaýǵan jyl» boldy. Tasymaldan yǵyr bolǵan balalardyń teń jartysy bul qamyttan qutylǵanmen, qalǵan bóligine sol kepeshti kıe turýǵa týra keledi. Biraq, bir oqý jylynda tórt mekteptiń ashylýy – aıtýǵa turarlyq jańalyq.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy.
