Halyq arasynda túsindirý jumystary júrgizilip jatqanyna, qalaǵa aınalma jol arqyly kirip-shyǵýǵa tyrysqandardyń áreketi zańsyz ekenine toqtalǵan ákim, azamattardy qaýipti ınfeksııanyń taralýyna jol bermeýge shaqyryp, turaqtandyrý qoryn áleýmettik mańyzy bar azyq-túlik taýarlarymen qamtamasyz etý úshin qala bıýdjetinen qosymsha 5 mlrd teńge bólingenin, aldaǵy ýaqytta azyq-túlik tapshylyǵy bolmaıtynyn atap ótti.
«22 naýryzdyń túninen bastap qalaǵa kirý men shyǵý tolyǵymen shekteldi. Kezekshiliktegi barlyq qyzmetter, sonyń ishinde áskerı qyzmetkerler, dárigerler, sanepıdemıologtar men polıseıler barlyq qajettiliktermen jabdyqtalǵan. Aýrý belgileri bar adamdardy anyqtaıtyn mobıldi oqshaýlaǵysh ornatyldy. Osyǵan baılanysty polısııaǵa qalanyń barlyq perımetri boıynsha baqylaýdy kúsheıtý tapsyryldy. Sondaı-aq Elbasy tapsyrmasy boıynsha «Jańa Alataý» qory arqyly muqtaj jandarǵa kómek kórsetilip jatyr. Kómekke muqtaj jandardy qoldaýdyń ózge de sharalary qabyldanýda. Onyń ishinde, kommýnaldyq tólemderdi ýaqytyly tólemegenderge aıyppuldar men ósimaqylardyń salynbaıtynyn atap ótken jón» dep jazdy Baqytjan Saǵyntaev.
