Abaı • 27 Naýryz, 2020

Abaı ánin Aıben shyrqady

196 ret

kórsetildi

3 mın

oqý úshin

Abaı hakimniń ólmes óleńderi Alashty asyp, Túrkııa tórinde saltanat qurýda. Aqyn mereıtoıyn elimizden bólek túrkitektes halyqtardyń kóbi atap ótip jatyr. Mereıtoıǵa tartý retinde Túrkııanyń opera ánshisi Aıben Ersoı uly oıshyldyń ánin áýeletip, tipti beınebaıan da túsirdi. Bul týraly gazetimizdiń saıtynda alǵash jarııalap, oqyrmandarymyzǵa Ulystyń uly kúni qarsańynda súıinshilegen bolatynbyz. Keıin QazAqparat tilshisi, áriptesimiz Aıjan Serikqyzy ánshimen suhbattasyp ta úlgergen eken.

Mıras ASAN

Túrkııalyq estrada juldyzy Aıben Ersoı óziniń Instagram-daǵy paraqshasynda «Bıyl maýsym aıynda Qazaqstannyń astanasynda uly aqyn Abaıdyń 175 jyldyǵy qurmetine festıval uıymdastyrý josparlanǵan bolatyn. Shart boıynsha, árbir elden kelgen qatysýshy uly aqynnyń bir ánin shyrqaýy kerek edi. Biz de Abaıdyń «Kózimniń qarasy» atty týyndysyn zamanaýı aranjırovkada ázirledik. О́tken aptada Ystanbuldyń eń kórikti jerleriniń biri – Sultan Ahmet meshiti mańynda klıp túsirdik. О́kinishke qaraı, qaýipti vırýstyń taralýyna baılanysty bul joba toqtatyldy. Alaıda biz bastaǵan isimizdi aıaqtap, týyndyny sizdermen bólisýdi jón kórdik», dep jazypty.

Sonymen birge ánshi QazAqparat tilshisine bergen suhbatynda qazaq ánimen qalaı tanysqanyn aıtyp bergen. «Qazaqstanǵa túrli joba boıynsha birneshe ret barǵanmyn. «Qazaqstan» ulttyq arnasy ótkizgen «Silk Way Star» baıqaýynyń qazylar alqasyna múshe boldym. Bul keremet joba boldy. Onda tek kamera aldynda ǵana emes, sahna syrtynda da baýyrlarymmen umytylmas sátter ótkizdim. Sol kezderi qazaq mýzykasyn estip, bizdiń halyq ánderimen uqsas ekenin ańǵardym. Qazaq mýzykasymen tanysqan kúni eki halyqqa da osy sezimdi jetkizip, erteden ulan-ǵaıyr aýmaqta tamyrymyzdyń ortaq bolǵanyn eske salǵym keldi. «Kózimniń qarasy» ánin alǵash estigen sátte-aq júregime jetti. Bastapqyda sózderdi túsinbesem de, ánniń ne týraly ekenin sezingendeımin. Sondyqtan men úshin Abaıdyń osy ániniń orny bólek», dedi A.Ersoı.

Qazir Aıben hanym Qazaqstan syndy ózge de baýyrlas halyqtardyń ulttyq ánderimen tanysýǵa múmkindik beretin jobalardy josparlap júrgenin aıta ketken jón. «Bizdiń álem aınalamyzdaǵy nárseni tez ózgertip jatqanyna qaramastan, bizdiń ishimizde óte qundy negiz bar. Biz – kún saıyn ózimizdi jańa deńgeıge kóterip, úzdiksiz damıtyn jaratylyspyz jáne kún saıyn ózimizdi jańa qyrymyzdan tanımyz. Jańa baǵytqa umtyla otyryp, biz Abaı sııaqty qundy negizderdi bolashaqqa jetkizýimiz kerek. Abaı syndy tulǵalar álemdi jaqsylyqqa bastaý úshin týady. Álemdegi beıbitshilik pen mahabbat úshin uly aqynnyń mereıtoıymen quttyqtaımyn», deıdi túrkııalyq ánshi.

Dana Abaıdyń adamzatqa ortaq tulǵa ekenin ánimen nasıhattap júrgen talantty ánshi Ersoıǵa eldiń yqylasy erekshe dep bilemiz. Qandas qaryndasymyzǵa úlken óner kógine qaqqan qanatyń talmasyn dep tilek aıtamyz.