Úsh kúnge sozylǵan «Dalalyq yrǵaq-2013» ekinshi týrıstik jáne avtorlyq án baıqaýy «Aqtóbe teńizi» sý qoımasyndaǵy «Saıahat» qalalyq jaǵajaıynda uıymdastyryldy.
Úsh kúnge sozylǵan «Dalalyq yrǵaq-2013» ekinshi týrıstik jáne avtorlyq án baıqaýy «Aqtóbe teńizi» sý qoımasyndaǵy «Saıahat» qalalyq jaǵajaıynda uıymdastyryldy.
Týrıstik jáne avtorlyq ánder festıvalin ótkizýdegi maqsat avtorlyq án janryn damytý, oryndaýshy talanttardy taýyp, olardyń shyǵarmashylyq ósýine kómektesý, týrızm men sporttyń belsendi túrlerin nasıhattaý bolyp tabylady. Baıqaýǵa otandyq ónerpazdarmen birge Reseıden ókilder qatysty. Bıylǵy sharaǵa qatysýshylardyń quramy ótken jylmen salystyrǵanda anaǵurlym kóp boldy.
Án baıqaýyn týrızm bólimi oblystyq kásipkerlik jáne ındýstrııalyq-ınnovasııalyq damý basqarmasymen birlesip uıymdastyrdy. Aqtóbelik qolóner sheberleriniń qolynan shyqqan buıymdar úsh kún boıy kórme-saýdada turdy.
Alǵashqy kúni án-bı, etnomádenı birlestikter ujymdary, ý-shý jáne kapoeıra, bodıbılder komandalary ónerlerin kórsetti. Balalar sýret baıqaýyna qatysty jáne qumnan kóne ǵasyrlyq ǵımarattardyń qurylysyn saldy. Shahmat pen toǵyzqumalaq ulttyq oıynynan jarystar ótti. Munymen birge, qalalyq tehnıkalyq shyǵarmashylyq ortalyǵynyń keme úlgileri úıirmesine qatysýshy jasóspirimder óz sheberlikterin kórsetti. Bul kezde eresekter «4h4 H-terra» jolsyz týrızm klýbynyń retromashınalary men motosıklderdiń kórmesin tamashalap, jaǵajaı voleıbolynan synǵa tústi. Avtorlyq jáne týrıstik jańa ánder jaǵajaı aspanyn ádemi áýenge bóledi. Festıvaldyń ashylý saltanatynda oblys ákiminiń birinshi orynbasary Nurmuhambet Ábdibekovtiń sahnaǵa shyqqan bette Býlat Okýdjavanyń óleńin oqyp, gıtaramen Oleg Mıtıaevtiń «Bizderdiń bárimizdiń búgin osy jerge jınalǵanymyz qandaı jaqsy!..» degen ánin shyrqaýy da saltanatty sáttiń básin arttyrdy.
– Adamnyń kóńil kúıi avtorlyq ánderde meılinshe ashyq kórinedi. Sondyqtan mundaı án merekeleri kerek. Munda dostyq, ómirdiń qymbat sátteri, náziktik pen meıirim áýen qanatymen óriledi. Meniń tustastarym osyndaı ásem ánderdi estip eseıdi, – dedi N.Ábdibekov.
Reseı Federasııasynyń eńbek sińirgen mádenıet qaıratkeri, Qýandyq qalalyq mádenıet bóliminiń basshysy jáne «Qýandyq» festıvaliniń jetekshisi Vıktor Kalachev:
– Mundaǵy óner toptaryn, onyń ishinde aqtóbelik ánshilerdi Reseıde de jaqsy biledi. Men osy kúnderi Orskide ótip jatqan «Babe leto» án baıqaýynan bas tartyp, arnaıy osynda keldim. Bul án baıqaýynda jas ánshilerdi kórip, talantyna súısindim. Festıvaldyń uıymdastyrylýy maǵan qatty unady, – dedi.
Biz festıvaldy uıymdastyrýǵa atsalysyp júrgen Orynbor oblysyndaǵy «AP» shyǵarmashylyq birlestiginiń jetekshisi Ivan Makashovty áńgimege tarttyq. Ol mundaı týrıstik jáne avtorlyq án baıqaýy Orynbor oblysynda úshinshi ret ótkizilgenin, Samarada ótetin festıvalda ózderiniń alańy bar ekenin jetkizdi.
– Festıvaldy uıymdastyrý arqyly 100 jastyń bireýiniń qolyna syranyń ornyna gıtara ustatsaq, sonyń ózi paıda. Maqsat – bard ánderin nasıhattaý arqyly jastardy salamatty ómirge jaqyndatý. Mine, festıvalden utarymyz osy. Bıyl Aqtóbede ekinshi ret ótkizilip otyr. О́tken jyly «Sazdy» sý qoımasynda uıymdastyryldy. Týrızmdi damytýdyń bir tetigi osyndaı án baıqaýlary ekenin aıtqan jón, dedi ol. Án baıqaýynyń uıymdastyrylýyna Orsk qalasynyń «Aprel» avtorlyq ánder teatr-stýdııasynyń jetekshisi Lılııa Solodova da rızashylyǵyn bildirdi. Osyndaǵy qolóner sheberleri kórme-sheberhanasynda qolóner tigýmen aınalysatyn almatylyq Nurgúl Dálelhan qaryndasymyzdy kezdestirdik. Nurgúl oblysta ótken bir kórmege qatysyp, sonda tanysýdyń sáti túsken. Ol mundaı sharalardan qalmaıtynyn aıtyp, týrızmdi damytýǵa halqymyzdyń qolóner buıymdaryn nasıhattaý alǵyshart jasaıtynyn jetkizdi. Osy festıvaldiń uıymdastyrylýynda erli-zaıypty aqtóbelik Akchýrınderdiń eńbegi zor ekenin atap ótý jón.
Festıval baǵdarlamasynda jarqyraı kóringen ónerpazdarǵa arnaıy baǵaly syılyqtar men dıplomdar tabystaldy. «Saıahat» jaǵajaıynda gıtaramen án shyrqaǵandardyń daýysy túnniń bir ýaǵyna deıin qalyqtady.
Satybaldy SÁÝIRBAI,
«Egemen Qazaqstan».
Aqtóbe oblysy.
