Shaharda áleýmettik járdemaqyǵa qatysty arnaıy koll-ortalyq úzilissiz jumys istep jatyr. Onda 13 adam eki aýysymmen turǵyndar saýalyna jaýap berip, járdemaqy men azyq-túlik sebetin alý joldaryn túsindiredi.
– Atalǵan járdemaqyǵa ótinish bergenderdiń basym bóligi shaǵyn jáne orta bızneste eńbek etetin jumysshylar, sondaı-aq, jeke tájirıbemen aınalysatyndar. Atap aıtqanda, notarıýs, advokat pen medıator syndy ózin-ózi jumyspen qamtyp otyrǵandar. Máselen olar ótken jyldarǵa esep berýdi umytyp ketse, salyq mamandary atalǵan jeke kásipkerdiń aǵymdaǵy esepshotyn buǵattaýǵa quqyly. Osy tusta shuǵyl sharalardy qolǵa aldyq. Atap aıtqanda, bizdiń departtamentegi mamandar ár tulǵanyń máselesin jeke-jeke qarastyryp, sheshýge kirisken, – deıdi qalalyq Memlekettik kirister departamenti basshysynyń orynbasary Orynkúl Qazıeva.
Sondaı-aq búginge deıin almatylyq zeınetkerler men az qamtylǵan kóp balaly januıalarǵa 5 myńnan astam azyq túlik sebetteri úlestirildi. Igi shara áli de jalǵasyn taýyp jatyr.
