Ońtústik Qazaqstan oblysyndaǵy Túrkistan qalasy-tegi bir, tarıhy ortaq túrki elderiniń túp qazyǵy. Túrkistan ısi musylman elderi úshin ǵana emes, dúnıejúzi halqy úshin de qasıetti mekenge aınalǵan shahar. Jyl saıyn bul jerge álemniń jáne elimizdiń ár aımaǵynan 700 myńnan asa adam keledi eken. Bul týraly «24 kz» habarlady.
Kelýshilerdiń basymdyǵyna oraı, jergilikti bılik birneshe jobalardy iske asyrýdy kózdep otyr. Qazirgi kezeńde Q. A. Iаssaýı kesenesi mańynda bıznestiń áleýmettik jaýapkershiligi sheńberi aıasynda 200 orynǵa laıyqtalǵan týrıstik ortalyq salynýda. Ol jerden qonaq úı, tamaqtanatyn oryn, avtoturaq oryn alady. Kelesi bir ǵımaratqa «Qolóner sheberleriniń ortalyǵy» degen ataý berilmek. Osy atalǵan eki nysannyń qurylysyna oblystyq bıýdjetten 700 mln. teńgege jýyq qarajat bólingen. Ázirge týrızmdi damytýǵa baǵyttalǵan jumystardyń alǵashqy nobaıy osyndaı.
"Negizgi kesenege keletin úlken dańǵyl jol bar. Sol dańǵyl joldan trolleıbýs júrgizýdi qolǵa almaqpyz. Osy 3-4 shaqyrymdy qamtyp ótsek, ol qalanyń zaman talabyna saı bolýyna, onyń ekologııasyna, qalanyń kelbetine de oń úlesin qosady", - deıdi Túrkistan qalasynyń ákimi Baqytjan Áshirbekov.
Aldaǵy ýaqytta «Áziret Sultan» qoryq-murajaıyn ashý, qala tarıhynan syr shertetin túrli kitaptardy shyǵarý josparda tur. Bastysy, ejelgi Saýran qalashyǵy ashyq aspan astyndaǵy mýzeıge aınalady jáne Úkash ata men Gaýhar ana kesenesi sekildi nysandarǵa jol tóselip, ınfraqurylym júrgizilýde. Munan ózge, 3 týrıstik ortalyq ashylady.
Danııar Túımebaı.
