«Vırýs Qytaıdyń Ýhan qalasynan shyqqany málim. Sondaı-aq qaladaǵy janýarlar bazary Ýhan bıologııalyq ınstıtýtynan taıaq tastam jerde turǵany da belgili. Áli de anyqtaıtyn másele kóp», dedi Maık Pompeo Fox News arnasyna bergen suhbatynda.
Ǵalymdar AQSh memlekettik hatshysy aıtqan janýarlar bazary koronavırýstyń shyqqan jeri bolýy múmkin degen boljam aıtqan edi. Budan bólek, M.Pompeo Qytaı bıligin ashyqtyqqa shaqyrdy.
«Dál qazir keregi – Qytaı bıliginiń ashyqtyǵy. Olar yntymaqtasýǵa ázir ekenin aıtady. Munyń eń tıimdi joly – álemge, álemniń ǵalymdaryna vırýs qalaı shyqqanyn, qalaı taraǵanyn anyqtaýǵa múmkindik berý», dedi M.Pompeo.
Aıta keterligi, AQSh tarapy Covid-19 vırýsy Ýhandaǵy bıologııalyq zerthanada jasalýy múmkin ekenin alǵa tartyp otyr. Qytaı bıligi muny joqqa shyǵardy. Ǵalymdardyń paıymdaýynsha, vırýs tabıǵı jolmen paıda bolǵan, genetıkalyq ózgeris engizilmegen. Áıtse de, Covid-19-dyń qalaı shyqqany týraly málimet naqty emes.
