Qazaqstan musylmandary dinı basqarmasy astronomııalyq zertteý ortalyqtarynyń málimetine súıenip, sondaı-aq Mysyr, Túrkııa, Reseıdiń, О́zbekstan jáne Qyrǵyzstan musylmandary dinı basqarmalarynyń ustanymdaryn eskere kele, bıyl Ramazan aıyn elimizde 24 sáýir kúni bastaýǵa sheshim qabyldady. Ramazan aıy 30 kúnge jalǵasyp, 24 mamyr kúni oraza Aıt namazy oqylady dep josparlanýda.
Sharıǵat boıynsha balıǵatqa tolǵan, aqyl-esi durys árbir musylmanǵa ramazan aıynda kúnde tań atqannan kún batqanǵa deıin oraza tutý – paryz. Alaıda, jolaýshylarǵa, syrqattanǵan nemese densaýlyǵy nashar adamdarǵa, júkti nemese omyraýda balasy bar áıelderge oraza tutýdy keıinge qaldyrýǵa sharıǵat ruqsat beredi.
- Kárilik nemese aıyqpaıtyn aýrý sebebinen oraza ustaýǵa shamasy kelmeıtin adamdar orazanyń ár kúni úshin pidııa beredi. Bıyl 1 kúnniń pidııasy 1700 teńge dep belgilendi. Ol – orta eseppen 1 adamnyń tańǵy jáne keshki asy nemese onyń qunyna teń qarajat. Jaǵdaıy joq adamdardan pidııa berý talap etilmeıdi. Qajettiligin qospaǵanda, mal-múlki, dúnıesi kúmis nısabyna jetken, ıaǵnı 127 myń teńgesi bar adam ramazan aıynda ózi jáne januıasy úshin pitir sadaqa berýi – ýájip. Bıyl 1 adamnyń atynan beriletin pitir sadaqa mólsheri 370 teńge dep bekitildi. Pitir sadaqanyń quny respýblıka boıynsha eseptegende unnyń naryqtyq ortasha baǵasymen shyǵaryldy. Materıaldyq múmkindigi bar adamdar pitir sadaqany meıiz (3920 teńge) nemese qurma (9400 teńge) qunymen bergeni abzal.
Ramazan aıynda jasalǵan árbir jaqsylyqqa eselep saýap beriledi. Sondyqtan kópshilik saýapty umit etip, osy aıda zeket berýdi ádet etken. Zeket berýmen zeket berýshiniń mal-dúnıesi tazarady, berekesi artady. Islam dininde baı adamdardyń zeket berýi – paryz. Baı dep qaryzy men qajettiliginen artyq ósimdi mal-dúnıesi dál qazirgi ýaqytta 1 mln 170 myń teńgege jetken nemese nısab mólsherinde qoıy, sıyry, túıesi, jylqysy bar adamǵa aıtylady, dedi Mańǵystaý oblystyq ortalyq meshitiniń bas ımamy Ánýar Eljanov.
О́z kezeginde Á.Eljanov vahtalyq ádispen jumys isteıtin azamattardy oraza ustaǵan kezde (aýyzashar men sáresi ýaqytynda) karantın erejesin qatań saqtaýǵa (1 metr araqashyqtyqty) shaqyrady. «Negizinde, qazirgi jaǵdaıdy eskersek, vahtalyq ádispen jumys isteıtin azamattar óz qaýipsizdigi úshin orazany keıin de ustaı alady» delingen fatua.kz saıtynda, dedi ol.
