Qazaqstan • 21 Sáýir, 2020

Qytaı dárigeri: Indetpen kúreste ár el ulttyq tanymyna súıenýi kerek (vıdeo)

650 ret
kórsetildi
3 mın
oqý úshin

Álem elderin tyǵyryqqa tiregen aty jaman tumaýmen kúsh biriktire kúresýdiń mańyzy zor. Bul rette alapat qasiretten eń kóp zardap shekkenderdiń biri Qytaı memleketi. Birneshe kúnnen beri qytaıdyń bilikti 10 dárigeri Almatyǵa kelip onlaın sabaqtar ótkizip, óz tájirıbelerimen bólisip jatqany belgili.

Qytaı dárigeri: Indetpen kúreste ár el ulttyq tanymyna súıenýi kerek  (vıdeo)

Jappaı jumylýdyń arqasynda qytaı qaterli indetti tolyq jeńdi demesek te, tajaldyń betin toıtardy. Alyp memlekettiń osy baǵyttaǵy tyń tájirıbelerin álemniń birqatar elderi nysanǵa alyp, koronavırýspen kúreste olardyń aqyl-keńesine júginýde.

Almatyda ótip jatqan qytaılyq dárigerlerdiń koronavırýs týraly onlaın sabaǵyna qatysý - tegin. Bul sabaqtar tek qazaqstandyq mamandardyń ǵana emes, sheteldik dárigerlerdiń de qyzyǵýshylyǵyn týdyryp otyr. Kúni keshege deıin Almatyda koronavırýspen kúres tásilderin úıretý úshin Qytaıdan kelgen delegasııanyń onlaın trenıngin 700-ge jýyq medısına qyzmetkeri tyńdaǵan.

Sabaqtar tek emdeý men dıagnostıka salasyna ǵana qatysty ótip jatqan joq. Aıtalyq, Shyńjań okrýgindegi dostyq gospıtaliniń aǵa medbıkesi Iý. Iаnsıa ınfeksııalyq stasıonardy zararasyzdandyrý tásilderimen bólisti. «Oqshaýlaýdyń basty sharty - «1 naýqas – 1 palata» qaǵıdasyn ustaný. Biz aýrýhanalardy 3 tıpke bóldik. Jasyl - taza aımaq, sary - jartylaı taza aımaq, qyzyl - juqtyrý aımaǵy. Bul aımaqtardyń árqaısysyn ózinshe tazalaıtynbyz. Orta eseppen kúnine 2 ret zararsyzdandyryp otyrdyq. Aýany, qabyrǵalardy, eden men qural-jabdyqtardy dezınfeksııaladyq. Tolyq zararsyzdandyrýǵa 30 mınýt ýaqyt ketedi. Dezınfeksııadan shyqqan soń barlyq materıaldar joıylady», - dedi óz tájirıbesimen bólisken maman.

Qytaıdan Almatyǵa kelgen taǵy bir bilikti maman Sıý Gaýnfeng denesin dert dendegen jandarǵa psıhologııalyq kómek kórsetýdiń mańyzy zor ekenin tilge tıek etti. Dárigerdiń sózinshe, karantınde otyrǵan jandardyń júıkesi tez syr beredi. Sondyqtan ár el óziniń ulttyq tanymynan syr shertetin túrli bılerimen, ánderimen de naýqastardyń kóńiline medeý syılaı alady.

Bul turǵyda ol qazaq dárigeriniń «Qara jorǵa bıin bıleýi Ýhandyq naýqastardyń ońalýyna oń áser etkenin mysal retinde aıta ketti. Sıý Gaýnfengtiń aıtýynsha, naýqastar kúnine eki márte tynys alýdy jaqsartatyn jattyǵý jasap, bı bılegeni durys. Eń bastysy bári de kóńil kúı yrǵaǵyna saı bolǵany abzal.

Qytaıdan arnaıy kelgen mamandar Almatyda 23 sáýirge deıin bolady. Aldaǵy kúnderi taǵy da birneshe onlaın sabaq ótkizý josparda bar.