Byltyr ınfraqurylymdy damytýdyń 2015-2019 jyldarǵa arnalǵan «Nurly jol» memlekettik baǵdarlamasy aıasyndaǵy jumystar tolyǵymen aıaqtalǵan bolatyn. Nátıjesinde avtomobıl joldarynyń 3 myń shaqyrymy qaıta jańartylyp, 10 myń shaqyrymy jóndelgen edi. Al bıyl 4 myń shaqyrym jol qurylysy iske aspaq.
– Joldardyń 682 shaqyrymyna tólem alý júıesi engizildi. Avtomobıl joldary salasyndaǵy jumystarǵa 100 myńǵa jýyq adam jumyldyryldy. Sonymen qatar, jergilikti mańyzy bar joldardyń 15 myń shaqyrymy jóndeldi. Atalǵan sharalar jaqsy jáne qanaǵattandyrarlyq jaǵdaıdaǵy respýblıkalyq mańyzy bar avtomobıl joldarynyń úlesin 88%-ǵa deıin jetkizýge múmkindik berdi. Sonyń nátıjesinde, jergilikti tas joldardyń úlesi 71%-ǵa deıin artty. I-II tehnıkalyq sanattaǵy kólik joldarynyń uzyndyǵy 8,2 myń shaqyrymǵa ulǵaıdy, – dedi Indýstrııa jáne ınfraqurylymdyq damý mınıstrligi Avtomobıl joldary komıtetiniń tóraǵasy Saıranbek Barmaqov.
Aıtalyq, byltyr Úkimet qaýlysymen ınfraqurylymdy damytýdyń 2020-2025 jyldarǵa arnalǵan «Nurly jol» memlekettik baǵdarlamasy bekitilgen bolatyn. Baǵdarlama aıasynda aldaǵy 6 jylda 10 myń shaqyrym joldy salý jáne rekonstrýksııalaý, respýblıkalyq jelidegi 11 myń shaqyrym avtomobıl jolyn kúrdeli jáne ortasha jóndeýden ótkizý josparlanǵan. Buǵan memleket jalpy kólemi 3,5 trln teńge bólgen edi.
S. Barmaqovtyń aıtýynsha, elimizdegi sapaly joldardyń uzyndyǵy 60%-ǵa ósedi. Sonymen qatar, Elbasynyń el óńirlerin kóliktik ınfraqurylymmen qamtamasyz etý qajettigi jónindegi tapsyrmasyna sáıkes jergilikti joldardyń 27 myńnan astam shaqyrymy jóndeledi. Bul oblystyq jáne aýdandyq mańyzy bar joldardyń 95% paıyzyn jaqsy jaǵdaıǵa jetkizýge múmkindik bermek.
Baspasóz maslıhaty barysynda «QazAvtoJol» UK» AQ basqarma tóraǵasy Ulan Álipov taǵy da birneshe qalaaralyq joldarǵa tólem alý júıesi engiziletinin aıtty.
– «Computer Vision Technologies» JShS basqaratyn konsorsıýmmen 11 myń shaqyrym jolda tólem alý júıesin ornatý jáne ony kútip ustaý jónindegi kelisimge qol qoıyldy. Joba quny 138,8 mlrd teńgeni quraıdy. Kelisim aıasynda rekonstrýksııadan ótken 5,7 myń shaqyrym jol aqyly bolady dep josparlanýda – dedi ol.
Aıta keteıik, naýryz aıynda ońtústik óńirlerde qurylys-montaj jumystary bastaldy. Aýa-raıynyń qolaıly jaǵdaıy ornaǵanda jumystar soltústik óńirlerge qaraı aýyp, sáýir aıynyń sońyna deıin jolshylar barlyq jobalar aıasyndaǵy qurylys jumystaryna kirisetin bolady. Qurylys alańynda mamandardy koronovırýstan qorǵaýǵa qajetti sharalar qabyldanǵan.
