Memleket basshysynyń tapsyrmasymen 42,5 myń teńge kóleminde áleýmettik tólemdi alýshylar tizimi keńeıtildi.
«Men dekrettik demalystaǵy jalǵyzbasty anamyn. Úsh bala tárbılep otyrmyn. Qazir memleket bizge kómektesýde. Men 42,5 myń teńge kóleminde tólem alýǵa ótinish bergen soń, telefonyma áleýmettik kómek taǵaıyndalǵany týraly habarlama keldi. Men dereý 20 sandyq karta málimetterin jiberip, aqshalaı kómek aldym. Osynaý qıyn kúnderi bizdi nazardan tys qaldyrǵan joq. Sondaı-aq, Biz birgemiz aksııasy aıasynda ákimdik Nur Otan partııasymen birge azyq-túlik sebetterin taratty. Biz bul kómek úshin óte qýanyshtymyz», – deıdi úsh balanyń anasy Ǵalııa Baıtóreeva.
Tótenshe jaǵdaı kezinde áleýmettik kómekti buryn resmı jumys istegen adamdar ǵana emes, ózin-ózi jumyspen qamtyǵan, bir jyldan beri dekrettik demalystaǵy áıelder, sondaı-aq stýdentter alady. Buryn habarlanǵandaı, 42,5 myń teńge kóleminde áleýmettik járdemaqy alýǵa ótinishterdi «Elektrondy úkimet» veb-portaly, telegrambot egov.kz nemese 42500.enbek.kz saıty arqyly onlaın-rejımde berýge bolady. О́tinimdi berý ádisteri barynsha jeńildetilgen.
Elbasy tapsyrmasy boıynsha 50 myń kóleminde áleýmettik kómekti 14,5 myńǵa jýyq qala turǵyny aldy. Onyń jalpy somasy 724 mln teńgeni quraıdy. Atalǵan kómekti taǵy 28 myń adam alady, al bul 1,4 mlrd teńgeni quraıdy. Osy kómek alatyndar sanatyna az qamtylǵan otbasylar, múgedekter (1,2-shi toptaǵy múgedekter, múgedektigi bar zeınetkerler, AÁK alýshylar), múgedek balaǵa kútim jasaýshy tulǵalar (AÁK alýshylar), zeınetkerler (eń tómengi zeınetaqy alýshylar), jetimder, UOS qatysýshylary men múgedekteri, olarǵa teńestirilgen azamattar jáne tyl ardagerleri.
Sonymen qatar, basqa da áleýmettik qoldaý sharalary kórsetilýde. Atap aıtqanda, ataýly áleýmettik kómek, azyq-túlik paketin berý túrindegi kepildendirilgen áleýmettik kómek, medısınalyq maskalar jáne basqa da qorǵanysh zattary taratylýda.
