Onda oblys ortalyǵynan 260 shaqyrymdaı qashyqtyqta ornalasqan Aqterek aýylyndaǵy stýdent jastardyń janaıqaıy aıtylǵan edi. Atap aıtqanda, alystaǵy aýylda uıaly baılanys pen ınternet jelisiniń joqtyǵynan Qaraǵandynyń kolledjderinde oqıtyn jastardyń tótenshe jaǵdaı rejıminiń tártibi boıynsha qashyqtan oqı almaı otyrǵany maqalaǵa arqaý bolǵan-dy. Sondaı-aq, ol jazbada atalǵan aýyldyń 41 turǵyny qol qoıyp, Qarqaraly aýdanynyń ákimi Eldar Dúısetaevqa joldaǵan ótinish hat týraly da sóz qozǵalǵan edi. Hatta aqterektik ata-analar ınternettiń ıgiligine qol jetkize almaı, sol sebepti oqýshy jáne stýdent balalarynyń qashyqtan oqı almaı otyrǵanyn jazyp, aýdan basshysynan shıelenisken máseleniń túıinin sheshýge kómektesýin suraǵan bolatyn.
Taıaýda, «Jazylǵan jaıdyń jańǵyryǵy» bolyp, atalǵan maqalaǵa jaýap hat keldi. Qarqaraly aýdany ákiminiń orynbasary S.Álıuly qol qoıǵan bul qujatta aýdandyq bilim bóliminiń bastyǵy, Qaraǵaıly kentiniń ákimi jáne «Qazaqtelekom» mekemesiniń ókilderi Aqterek aýylynda turatyn kolledj stýdentteriniń ata-analarymen kezdeskeni jáne máseleniń sheshý joldarynyń qalaı qarastyrylyp jatqany egjeı-tegjeı baıandalǵan.
Jalpy, Aqterek aýylyndaǵy №26 jalpy orta bilim beretin mektepte barlyǵy 37 oqýshy oqıdy eken. Onyń ishinde 23 oqýshy tómengi synyptarda bilim alsa, qalǵany 5-9-synyptardyń oqýshylary.
«Mektepte SkyEdge 4 Mbıt/s spýtnıktik ınternet júıesi bar, ol oqý prosessi men elektrondyq jýrnaldy toltyrý prosessin qamtamasyz etip tur.
Qazaqstan Respýblıkasy Bilim jáne ǵylym mınıstrliginiń №123, 04/01/2020 jáne №135, 04.08.08 j. buıryqtary jáne oblystyq memlekettik basqarmanyń 04.06.2010 jylǵy №80-1/NQ buıryqtary negizinde osy mekteptiń oqýshylary úshin arnaıy daıyndalǵan josparlardy taratý túrinde qashyqtyqtan oqytý uıymdastyryldy. Oqýshylarǵa qaǵaz júzindegi tapsyrmalardy mektep qyzmetkerleri jetkizip, baılanys ornatylǵan», dep jazylǵan jaýap hatta.
Sonymen qatar, aýyl balalary «Balapan» jáne «Qazaqstan» telearnalarynyń teledıdarlyq baǵdarlamalary arqyly da sabaq oqıdy eken. Al aýyldaǵy stýdentterge mekteptegi ınternetti paıdalanýǵa múmkindik berilipti. Tek, qashyqtan oqytý, tapsyrmalardy oryndaý jáne keri baılanys ornatý úshin qoldanystaǵy ınternet jyldamdyǵy jetkiliksiz kórinedi. Aýyldaǵy stýdentterdiń ınternet tolqynyn qýyp, taýǵa órmelep ketkeni de sodan bolsa kerek.
Eskere ketetin bir jaıt, Aqterek aýylyndaǵy 14 termınaldyń segizi isten shyǵyp, jóndeýge kelmegendikten úı ıeleri ınternet jelisin aǵytyp tastaǵan. Al aýdandyq ákimdiktegilerdiń sózine qaraǵanda, mundaı qondyrǵylar óndiriste joq eken...
«Qazirgi tańda «Qazaqtelekom» bul máseleni sheshýdiń joldaryn qarastyrýda. Ázirshe, aýylda stýdentteri bar tórt úıge «Qazaqtelekom» óz kúshimen tórt termınal taýyp, olardy ornatý jumystaryn qarastyryp jatyr. Sonda, aýylda 10 úıde jáne mektepte ınternet bolady. Iаǵnı, jalpy suranysty qanaǵattandyrýǵa múmkindik jasalady. Qosylǵan ınternet qondyrǵylardyń tehnıkalyq múmkindigi stýdentterdiń tapsyrmalaryn oryndaýǵa jáne WatsApp, basqa messendjerler arqyly keri baılanysty qamtamasyz etýge múmkindik beredi», deıdi jergilikti ákimdik ókilderi.
Budan bólek, ákimdik tarapynan bolǵan usynys boıynsha kolledjderdiń ákimshiligi stýdentterge qashyqtan oqytýǵa arnalǵan tapsyrmalardy «Qazposhta» jáne №26 mektepke elektrondy poshta arqyly jiberýge kelisken eken. Hatta aıtylǵandaı, ata-analar men oqýshylar bul máseleniń usynylǵan sheshimderimen tolyqtaı kelisipti.
Joǵaryda atalǵan maqala jaryq kórgennen keıin Qarqaraly aýdanynyń ákimi Eldar Dúısetaevtyń «Egemendi Qazaqstan» gazetiniń oblystaǵy qosynyna habarlasyp, mán-jaıǵa óz tarapynan tolyqqandy túsinik bergenin de aıta ketken lázim. Karantınniń jaǵdaıynda ǵana emes, jalpy aldaǵy ýaqytta aýdandaǵy aýyldyq jerlerdiń barlyǵyn ınternetpen qamtamasyz etý – bizdiń basym baǵyttaǵy mindetimiz. Osy baǵytta biz naqty nátıje beretin jobalardy qarastyrý ústindemiz. Al Aqterekke kelsek, ol aýyldyń máselesi tolyqtaı sheshilgenshe bizdiń jiti nazarymyzda bolady», dep sendirdi Qarqaraly aýdanynyń ákimi.
